Soğud Ğaräbstanı tışqı êşlär ministrlığı tarafınnan yasalğan urtaq belderüdä Soğud Ğaräbstanı, Törkiyä, Misır, Yordaniya, İndoneziya, Paqıstan, Qatar häm Berläşkän Ğaräp Ämirlekläreneñ AQŞ İlbaşı Donald Trampnıñ "Tınıçlıq şurası"na quşılu çaqıruın qabul itüe belderelde.

Çärşämbe könne yasalğan belderüdä här ilneñ üz xoquqıy protseduralarına qarap quşılu dokumentların imzalayaçağı äytelde. Tramp dönyaküläm bäreleşlärne çişü maqsatın quyğan bu initsiativasına quşılu öçen distälärçä dönya liderına çaqıru cibärgän ide.

Bu şuranıñ qorıluı İzrailneñ 2023nçe yılnıñ oktyabrennän birle 71 meñnän artıq keşeneñ ülüenä häm 171 meñnän artığınıñ yaralanuına kitergän Ğazzä suğışın tuqtatunı maqsat itkän plannıñ ikençe êtabın başlaw belän ber ük waqıtqa turı kilde.

'Tınıçlıq şurası'

Aq Yort, comğa kön kiç belän belderü yasap, “Tınıçlıq şurası”nıñ qorıluın, Ğazzädäge küçü barışın idarä itü öçen bilgelängän dürt strukturanıñ berse bulğan Ğazzä idaräse milli komitetınıñ raslanuın citkerde.

Başlığı Tramp bulaçaq häm sostavında yaqınça 15 dönya liderı urın alaçaq şura älegä qorılmağan Fälästin texnokrat xökümäten kontrol' itäçäk häm Ğazzäne yañadan tözü barışın küzätäçäk.

Şurağa quşıluı kötelüçe illär arasında Angliya, Germaniya, Fransiyä häm İtaliyä dä bar. BMOnıñ êlekkege Yaqın Könçığış wäkile Nikolay Mladenovnıñ isä “Tınıçlıq şurası”nıñ mäydandağı wäkile bulu mömkinlege äytelä.