AQŞ ilbaşı Donal’d Trump şimbä könne yasağan belderüendä AQŞnıñ İranda zur külämle suğış operaśiyäläre başlawın äytte häm AQŞ yağında yuğaltular mömkin buluı turında kisätte.

Tramp höcümnärneñ İrannıñ raketa mömkinleklären häm flotın yuq itügä yünältelüen belderde.  

Höcümnär İran atom häm ballistik raketa programmaların däwam itkän oçraqta qabat höcümgä duçar bulaçağı turındağı AQŞ–İzrail kisätülärennän soñ yasaldı.

Tramp “Truth Social” platformasında urtaqlaşqan videoda: “Min bu belderügä citdi qarawığıznı telim. İran rejimı üterergä teli”, – dide.

“Batır Amerika qaharmannarınıñ ğomere özelergä mömkin häm suğışta yış bulğanı kebek bez yuğaltular kiçerergä mömkin. Läkin bez monı bügenge kön öçen êşlämibez. Bez monı kiläçäk öçen êşlibez häm bu izge burıç”, – dip belderde ul.

Tramp İran qorallı köçlären häm İslam İnqıylab saqçıları äğ’zaların qoralların taşlarğa çaqırdı häm birelgän oçraqta alarğa qağılğısızlıq wäğ’dä itte.

Trampqa kürä, başqa variant – hiçşiksez ülem.

Vaşington belän Tähran soñğı atnalarda İrannıñ atom -töş  maqsatları turında berniçä söyläşü ütkärde.

Yaqlar arasında iñ soñğı oçraşu pänceşämbe könne buldı, läkin bernindi kileşügä dä ireşelmäde.

Tramp: “İran, distä yıllar däwamında bulğan kebek, monı da  kire qaqtı. Alar atom – töş  maqsatlarınnan baş tartu mömkinlekläreneñ barısın da kire qaqtılar häm bez moña tüzä almıybız”, – dide.