İran Yaqın Könçığıştağı AQŞ xärbi ob’yektlarına cawap qaytaru  maqsatında raketa höcümnäre oyıştırdı.

 İñ turıdan -turı höcüm Baxreyndağı AQŞ flotınıñ 5nçe flot ştab-kvartirasına yasaldı.  

Baxreyn xäbär agentlığı şimbä könne Juffair/Mina Salman port töbägendäge Baxreyn diñgez yärdäme xezmät üzägenä raketa töşüen rasladı.

Baxreyn milli êlemtä üzäge: “Bișençe flotnıñ xezmät üzäge raketa höcümenä duçar buldı. Soñraq centekle mäğ’lümat belän urtaqlaşırbız”, – dip belderde.

Yaqın Könçığış töbäge öçen cawaplı AQŞ üzäk köçlär komandirlığı älegä zıyan yäki qorbannar turında bernindi belderü yasamadı.

İran şulay uq İzrailgä ballistik raketalar belän höcüm itte.

İzrail saqlanu sistemalarınıñ bu raketalarnı totqarlawı xäbär itelde.

Yaqın Könçığıştağı AQŞ bazaları raketa qurqınıçı astında

Raketa höcümnäre İzrailneñ irtänge säğat’lärdä Tähranğa häm başqa İran ob’yektlarına  oyıştırğan höcümnärenä turıdan-turı cawap bularaq yasaldı.

AQŞ Saqlanu ministrlığı AQŞ köçläreneñ “Operation Epic Fury” qısalarında operaśiyädä qatnaşuın belderde.

İran räsmi zatları üz cirlärenä qarata teläsä nindi höcümneñ kürşe illärdäge AQŞ bazalarına cawap qaytaruğa kiteräçäge turında qat- qat kisättelär.

 İrannıñ östämä raketa ğamälläre töbäktä AQŞ urnaşqan başqa noqtalarnı da maqsat itep aldı.

Qatar wäqalätleläre üz cirläre östendä ike İran raketasınıñ totqarlanuın belderde. Qatarda AQŞ hawa köçläreneñ Äl -Udeyd hava bazası urnaşqan.

Berläşkän Ğaräp Ämirlekläre başqalası Abu – Dabida da  şartlawlar turında xäbär itelde. Şunnan soñ hawa kiñlege tiz arada yabıldı. Berläşkän Ğaräp Ämirleklärendä AQŞ köçläre qullana torğan strategik Äl - Dafra hava bazası bar.

Yordaniya başqalası Ammanda sirena tawışları yañğıradı, sośial’ media häm töbäk xäbärläre AQŞ ob’yektlarına yaqın cirleklärdä  raketa êşçänlege buluın alğa sördelär.

Kuveyt häm AQŞ köçlären qabul itüçe başqa Farsı qultığı illäre dä üz xalqına sıyınu urınnarında qalırğa quştılar.