Äfğanstan xökümäte süzçese birgän mäğlümatlarğa qarağanda, Paqıstan armiyäse, başqala Qabul belän berrättän Qandahar häm Paktika vilayätlären dä kertep, Äfğanstannıñ törle töbäklärenä hawa operatsiyäläre yasagan.

Äfğan räsmiläre üz belderüendä Paqıstan köçläreneñ "bilgele ber töbäklärne" nışan itep hawa operatsiyäläre yasawın häm cirle waqıt belän yaqınça säğat 02:30 tiräsendä Qabul üzägendä küp sanda zur şartlawlar terkälüen belderde. Äfğanstan xökümäte süzçese bu operatsiyälärdä bernindi ülem-kitem bulmawın äytsä dä, İslamabad küpkä awırraq küreneş täqdim itte.

Paqıstan ilbaşı idaräse süzçese Moşarraf Zaidi qara- qarşı utqa totularda 133 äfğan ğaskäriyeneñ üterelüen häm 200dän artıq keşeneñ yaralanuın citkerde. Zaidi, monnan tış, Paqıstan köçläreneñ 27 äfğan xärbi postın, ike korpus ştabın häm 80nän artıq tank belän köbäle texnikanı yuq itüen dä östäde. Paqıstandağı iminlek çığnaqları, Qandahardağı höcümnär waqıtında ber qoral saqlağıçı häm ber logistika bazasınıñ hawağa oçırtıluın belderde.

Şul uq waqıtta, Äfğanstan saqlanu ministrlığı äfğan köçläreneñ Durand sızığı buyınça Paqıstan nışannarına qarşı üç alu operatsiyäläreneñ tön urtasında tämamlanuın belderde. Pänceşämbe könne irtän dürt säğat däwam itkän çik buyı bäreleşendä, kim digändä, sigez Äfğanstan ğaskäriye häm ike Paqıstan ğaskäriye hälaq bulğan ide. Bu kiyerenkelek Paqıstannıñ uzgan atnadağı höcümnärennän soñ kilep çıqtı. Ul çaqta Paqıstan 70 "terrorçı" üterelde dip beldersä dä, BMO tınıç xalıq üleme turında xäbär itkän ide.

BMO ğomum särqatibe Antonio Guterreş bäreleşlär nisbätennän borçıluın belderde. Süzçese Stefan Duyarric äytüençä, Guterreş "qatnaşuçı yaqlarnı xalıqara xoquq qısalarındağı yöklämälären ütärgä" häm diplomatik çişeleş êzlärgä çaqırdı.