AQŞ ilbaşı Donald Tramp, problemalı häm qurqınıç waqıtlarnı säbäp itep kürsätep, AQŞnıñ saqlanu çığımnarın 2027 yılda 1,5 trillion dollarğa citkerüne täqdim itte.
Bu täqdim 2026 yıl öçen 901 milliard dollar dip bilgelängän xärbi byudjet belän çağıştırğanda sizelerlek artunı kürsätä.
Tramp bu arttırunı Venesuêla däwlät ilbaşı Nikolas Maduronı urlap, anı narkotiklar kontrabandasında ğayepläw öçen AQŞqa tapşıru maqsatınnan AQŞ xärbi operaśiyäse boyırığı birgännän soñ berniçä kön ütkäç soradı.
Operaśiyädän soñ Amerika köçläre Karib diñgezendä tuplanuın däwam itä.
Soñğı könnärdä Tramp şulay uq milli iminlek säbäpläre belän Daniya qaramağındağı Grenlandiyäne kontrol’gä alunı da kön täribenä kiterde häm Kolumbiyädäge xärbi operaśiyälärgä işarät itte.
Tramp “Truth Social” platformasındağı belderüendä byudjettağı çığımnarnıñ artuı AQŞqa üzeneñ xärbi sälätlären kiñäytergä mömkinlek biräçäk dip belderde.
Ul: “Bu bezgä küptännän layıq bulğan xıyallarıbızdağı xärbi köçlärne buldırırğa häm iñ möhime doşmannardan bäysez räweştä bezne İMİN totarğa mömkinlek biräçäk”,— dip yazdı.
Saqlanu çığımnarındağı ozın möddätle üzgäreşlärne raslarğa tiyeşle Kongress isä älegä bernindi belderü yasamadı.
