Germaniyaneñ tışqı êşlär ministrlığı belän İqtisadi xezmättäşlek häm üseş ministrlığınıñ urtaq belderüenä kürä Rusiyäneñ Ukraina cirlärendäge ênergetika, su belän täêmin itü, transport häm logistika infrastrukturasına höcümnäre arqasında êlektr belän täêmin itü kön sayın özelä, su belän täêmin itüdä qıyınlıqlar tua häm tağın da kübräk keşe öylären taşlap kitärgä mäcbür.

Belderüdä yaqınlaşuçı qış aldınnan Ukraina xalqınıñ töp ixtıyacların qanäğätländerü, ênergetika häm su belän täêmin itüne däwam itterü öçen östämä yärdäm kiräklege assızıqlandı. Şuşı maqsatlarda tışqı êşlär ministrlığı belän iqtisadi xezmättäşlek häm üseş ministrlığı tarafınnan 200 million yevro külämendäge östämä aqçanıñ tiz arada bireläçäge belderelde.

Belderüdä Germaniyaneñ tışqı êşlär ministrı Yoxann Vadeful’nıñ fikerläre urın ala. Ministr Rusiyäneñ Ukrainanıñ grajdanlık infrastrukturasına yünältelgän maqsatlı höcümnäre Mäskäw citäkçelegeneñ citdi söyläşülär alıp baru urınınа qışqı salqınnarnı üz faydasına qullanırğa tırışuın kürsätä dip belderde.

Vadeful Rusiyäneñ suğışnıñ bişençe qışında Ukraina xalqın ciñelergä mäcbür itü maqsatında cılıtu, su häm ênergetika infrastrukturasına tağın da kübräk höcüm itüenä iğtibar yünältte.

İqtisadi xezmättäşlek häm üseş ministrı Rim Alabali-Radovan da Rusiyä höcümnäre näticäsendä Ukrainadа millionlağan keşeneñ êlektr özelüläre säbäple salqında qaluın, küp kenä töbäklärdä su birü tuqtawın anlattı.

Radovan Rusiyäneñ Ukrainada yäşäw şartların yuq itärgä tırışuın äytte. Ul Germaniyaneñ cılıtu häm êlektr belän täêmin itü yärdäme aşa Ukraina xalqına üz ilendä yäşäwne däwam ittärgä mömkinlek birügä öleş kertüen citkerde.