Hindstan räsmiläre ilneñ könçığış yar buylarına täêsir itüe kötelgän Monta ğarasatı säbäple mäktäplärne yaptı häm tübän yar buyı töbäklärendä yäşäwçe un meñlägän keşene imin urınnarğa êvakuaśiyäläde.
Bengal qultığında bulğan Monta köçle tropik dawılğa äylände.
Meteorologiya idaräse mäğ’lümatına qarağanda, ğarasatnıñ sişämbe kiçendä Andxra - Pradeş ştatında urnaşqan Kakinada port şähäre tiräsenä kilep citüe kötelä.
Ğarasat xäzerge waqıtta Andxra - Pradeştağı Maçilipatnamnan yaqınça 160 çaqrım yıraqlıqta küzätelä.
Ğarasatnıñ köçen arttırıp säğatenä 90–110 kilometr tizlektä isüçe cil belän ilneñ könçığış yarlarına taba baruı kötelä.
Andxra - Pradeştağı afät törkemnäre xäzergä qadär tübän cirlärdä yäşäwçe 38 meñ keşene êvakuaśiyäläp yärdäm lager’larına urnaştırdı.
Räsmi zatlar 1906 yärdäm lagerı häm 364 mäktäptä sıyını urını äzerlägän, 1 238 qurqınıç astıında bulğan awılda êvakuaśiyälär däwam itä.
Mäktäplärgä häm universitetlarga çärşämbe könenä qadär yabıq bulu turında boyırıq birelde.
Balıqçılarnı diñgezgä çığmaw turında kisättelär.
Sişämbe könne poyezd häm oçqıç xezmätlärendä özekleklär küzätelde.
Odiśa ştatı da qurqınıç urınnarda yäşäwçe yaqınça 32 meñ keşene yärdäm lager’larına küçerä başladı.
Hindstannıñ könçığış yarlarında küptännän ğarasatlar küzätelä, läkin soñgı yıllarda yar buylarında köçle dawıllar sanı arta.
2023 yıl soñğı yıllarnıñ iñ küp qorban kitergän ğarasat sezonı bularaq terkälde - 523 keşe hälaq buldı häm yaqınça 2,5 milliard dollarlıq zıyan kiterde.
