Bötendönya sälamätlek saqlaw oyışması (BSSO), İzrailneñ bu atnada möhim çik qapqasın yañadan açuına qaramastan, Ğazzädä meditsina kiräk-yaraqlarınıñ xätär däräcädä kimüen belderde.
BSSOnıñ töbäk mödire Xanan Balxi comğa könne Ğazzädäge sälamätlek saqlaw ministrlığınnan alınğan mäğlümatlarğa tayanıp yasağan belderüendä, marlya häm ênä kebek qayber äyberlärneñ xäzerdän ük betüen äytte.
Balxi töp doru zapasları, travma däwalaw kiräk-yaraqları häm xirurgiyä materiallarınıñ bik nıq kimüen, yağulıq citmäw arqasında isä xastaxanälärneñ êşçänlege çikle buluın belderde.
Balxi xälneñ awır buluı, qul astında qalğan materiallarnıñ da tiz arada betä alaçağı turında kisätte.
Sişämbe köne Ğazzägä kerü yulın kontrol itüçe İzrail xärbi oyışması Kerem Äbu Sälim çik qapqasınıñ gumanitar yärdämneñ äkrenläp kerüenä açıluın citkerde. Oyışma êlegräk kerü noqtaların yabunıñ säbäben, İzrail häm AQŞ köçläreneñ şimbä könne İranğa höcüm itüennän soñ, kiyerenke hawa suğışı waqıtında İrannan kilep çıqa alaçaq raketa yanawları buluın belderde.
Ğazzädäge xastaxanälärneñ yartısı yabıq
Berläşkän Millätlär Oyışması agentlığına kürä, yaralı balalar häm xronik awıruı bulğan keşelärne dä kertep, yaqınça 18 000 keşe êvakuatsiyälänüen kötä.
Balxi sişämbe häm pänceşämbe könnärendä qayber medisina materialları häm yağulıqnıñ Ğazzägä kertelä aluın, läkin qayber yärdäm maşinalarınıñ xäzer dä Misırnıñ Äl-Ariş şähärendä kötep toruın äytte.
Balxı Ğazzägä här kön kerergä tiyeşle 600 yärdäm maşinasınıñ, iñ küp digändä, 200eneñ genä kerä aluın belderde, monıñ Ğazzädäge ixtiyaclarnı qanäğatländerü öçen citärlek bulmawın äytte. Ul, şulay uq, xastaxanälärne êşlätü öçen yağulıqnıñ kübräk kertelüenä röxsät birergä çaqırdı.
Balxi Ğazzädäge 36 xastaxanäneñ yartısı suğış tämamlanğannan birle yabıq buluın, açıq bulğan xastaxanälärneñ isä operaśiyä, dializ häm reanimatsiya kebek xezmätlärne däwam itüdä qıyınsınuın äytte.
