Rusiyäneñ Rumıniyädäge ilçelege, Rumıniyä hawa kiñlegenä dron kerüen Ukrainanıñ "provokatsiyäse" dip atadı. Bu xäl öçen Mäskäw ilçese Buxarest tışqı êşlär ministrlığı tarafınnan çaqırılğan ide.
İlçe Vladimir Lipayev, Rumıniyäneñ Rusiyäne ğayepläwen "nigezsez" dip bäyäläde. İlçelek belderüendä bolay diyelde: "Barlıq faktlar Kiev rejimınıñ bu provokatsiyäne maxsus oyıştırğan buluına işarä itä."
Şimbä könne Rumıniyä, Rusiyäneñ Ukraina çigenä yaqın infrastrukturasına höcüm waqıtında, il hawa kiñlegenä dron kerü säbäple, suğış oçqıçların cibärde. Saqlanu ministrı İonut Motyanu äytüençä, F-16 pilotları dronnı bärep töşerügä yaqın bulğan, läkin ul milli hawa kiñlegennä çığıp, Ukrainağa taba kitkän.
Dron höcümnäre qurqınıçı Polşanı da oçqıçlar cibärergä häm şimbä könne könçığış Lyublin şähärendäge aêroportnı yabırğa mäcbür itte. Bu xäl, Polşanıñ NATO berektäşläre yärdäme belän üz hawa kiñlegendä Rusiyä dronnarın bärep töşergännän soñ öç kön uzğaç buldı.
Rumıniyä, Awrupa Berlege häm NATO äğzası bulıp, Ukraina belän 650 km (400 mil) çik sızığın urtaqlaşa. Rusiyä kürşesenä qarşı suğış başlağannan birle, Rumıniyä cirenä Rusiyä dron qaldıqları berniçä tapqır töşte.
Şimbä könne Rumıniyä ike F-16 suğış oçqıçın häm soñraq ike “Eurofighter” cibärde — alar Germaniyäneñ Rumıniyädäge hawa saqlaw missiyälärenä kerä. Saqlanu ministrlığı belderüendä, Tulça ölkäsendäge Dunay yılğası yanında häm Ukraina çige yanında yäşäwçelärgä saqlanu çaraların kürergä kiñäş itelde.
Ministrlıq belderüendä ätelgänçä, oçqıçlar milli hawa kiñlegendä dronnı küzätkän, ul Çiliya Veçe awılınnan 20 km könyaq-könbatışta radarlardan yuğalğan.
Ukraina ilbaşı Volodimir Zelenskiy “X” sośial platformasında yasağan belderüendä, dronnıñ Rumıniyä territoriäsenä 10 kilometr çaması kerüe häm NATO hawa kiñlegendä yaqınça 50 minut buluı turında yazdı.
"Bu — Rusiyäneñ suğışnı kiñäytüe, häm alar näq şulay êşli," — dip belderde ul. "Rusiyägä qarşı sankśiyälär kiräk. Rusiyä säwdäsenä tariflar kiräk. Kollektiv saqlanu kiräk" dide ul.
NATO, Polşanıñ üz hawa kiñlegenä kerüçe dronnarnı bärep töşergännän soñ, comğa könne Awrupanıñ könçığış çiklären saqlawnı köçäytü planın iğlan itte. Bu — Rusiyäneñ Ukrainağa qarşı suğışı waqıtında NATO äğzası tarafınnan berençe tapqır ut açu oçrağı buldı.
