Paqıstannıñ Karaçi şähärendäge ber säwdä üzägendä çıqqan yanğında, kimendä, altı keşe ülde
Yanğın sünderü idaräse mödire säwdä üzägendä kiyem-salım, êlektr cihazları, kosmetika satuçı yaqınça 1200 kibet buluın häm bu xälneñ yanğınnıñ qırıslığın arttıruın belderde.
Wäqalätlelär belderüençä, Paqıstannıñ säwdä başqalası Karaçida ber säwdä üzägendä çıqqan zur yanğında, aralarında ber yanğın sünderüçe dä bulğan, kimendä, altı keşeneñ ğomere özelde häm küp sanda keşe yaralandı.
Karaçi şähäre munisipalitetı yanğın sünderü idaräse räsmiye Xamayun Xan jurnalistlarğa yanğınnıñ şimbä tönendä MA Jinnah yulındağı "Gul Plaza" säwdä üzägendä başlanuın häm yanğın sünderüçelärneñ kontrol' astına alırğa tırışuına qaramastan, älegäçä däwam itüen söyläde.
Xan süzlärenä kürä, säwdä üzägendä yaqınça 1200 kibet bar, alar arasında kiyem-salım, êlektr cihazları, kosmetika häm sawıt-saba satuçı kibetlärneñ da buluı yanğınnı köçäytkän. "Şuşı waqıtqa qadär waqıyğa urınınan altı mäyet çığarıldı, berse yanğın sünderüçe. Törkemnär wazğıyätne kontrolgä alu öçen bar köçlären quya", — dide ul.
Ülüçelär sanın aşığıç yärdäm häm xäyriyä oyışması "Edhi Fondı" da rasladı.
Töbäkne kilep kürgän Sindx gubernatorı Kamran Tessori, yanğın sünderüçelärneñ utnı kontrol' astına alırğa häm êçtä qaluı ixtimal bulğan keşelärne qotqarırğa tırışuın belderde.
Törle departament häm oyışmalardan waqıyğa urınına 20 yanğın sünderüçe maşina cibärelgän. Şul uq waqıtta, räsmilär binanıñ iske häm ışanıçsız buluın, qotqaru êşläreneñ bik saqlıq belän alıp barıluın äytä.