Kohat poliśiyase süzçese Möxämmäd Numan Zeb Paqıstannıñ «Express Tribune» gazetına birgän añlatmasında, qanunsız altın qazuğa qarşı operaśiya ütkärü öçen yulğa çıqqan poliśiya törkemenä Äfğänstan çigendäge Hayber-Pahtunhva provinśiyaseneñ Kohat rayonında qorallı höcüm oyıştırıluın belderde.

İminlek çığanaqları isä höcüm näticäsendä 11 poliśiya xezmätkäreneñ hälaq buluın, 12seneñ yaralanuın citkerde.

Höcümdä 5 poliśiya maşinasına da ut törtelgän. Älegä ber törkem dä cawaplılıqnı üz östenä almağan.

Höcümçelärgä qarşı maxsus operaśiya başlandı.

Paqıstandağı terrorçılıq probleması

Paqıstandа qorallı höcümnär bigräk tä Äfğanstan belän çiktäş Hayber-Pahtunhva häm Belucistan provinśiyalärendä yış bula.

İke provinśiyadä dä peştun häm beluc xalıqlarınıñ xoquqların yaqlawların belderüçe qorallı törkemnär Paqıstan iminlek köçlärenä häm tınıç xalıqqa qarata höcümnär oyıştıra.

İslamabad citäkçelege “Paqıstan Talibanı” oyışmasınıñ Äfğänstanda urnaşuın häm höcümnären biredän oyıştıruın belderä. Äfğänstan citäkçelege isä bu ğäyepläwlärne kire qağa.

Belucistanda “Belucistan Azatlıq armiyase”neñ (BLA) höcümnäre ayırım urın alıp tora. “BLA” Belucistannıñ Paqıstannan ayırıluın häm beluc xalqınıñ bu töbäkne üz idaräse astına aluın taläp itä.