Cirle wäqalätlelär mäğ’lümatına qarağanda, Nigeriyäneñ tön’yağındağı Kano ştatında bulğan yul-transport qazasında kim digändä 30 keşe ğömeren yuğaltqan.

Kano ştatınıñ xökümät süzçese yäkşämbe könne yasağan belderüendä: “Ülemgä kitergän bu qaza Gudjunguğa taba bara torğan yök maşinası yörtüçeseneñ  saqsız yörtüe arqasında buldı. Näticädä 30dan artıq keşe hälaq buldı, küp keşe awır cäräxätlär aldı”,-  dip citkerde.

Kano gubernatorı Abba Kabir Yosıf isän qaluçılarğa buşlay mediśina yärdäme kürsätergä quşqan.

Yullar naçar qaralğan häm yul xäräkäte qağıydäläre siräk ütälgän Nigeriyädä yul-transport hälakätläre yış oçrıy.

Federal’ yul xäräkäte iminlege oyışması FRSC mäğ’lümatına qarağanda, 2023 yılda ildä 9 570 yul-transport qazasında 5 421 keşe hälaq bulğan.