Balida su basular häm cir şuışular
Räsmi zatlar köçle häm artıq küp yañğırlarnıñ pänceşämbe könenä qadär däwam itäçäge turında kisätü yasadı.
İndoneziyäneñ cirle matbuğatı çärşämbe könne xäbär itüençä, berniçä kön däwam itkän köçle yañğırlar Bali utrawında kiñ külämle su basularğa häm cir şuışularına, şul uq waqıtta, toraq punktlarda häm populyar turistik urınnarda köndälek tormışnıñ qaqşawına säbäp buldı.
"Jakarta Globe" xäbär saytı mäğlümatlarına kürä, Denpasarda, yaqındagı yılgalarnıñ taşuı näticäsendä, uramnar häm öylär su astında qaldı. Sişämbe könne qayber töbäklärdä su däräcäse ber metrğa qadär citte.
Cirle xalıq, tezgä qadär mengän suda yöri-yöri, cihazları häm transport çaralarında citdi zıyan buluın belderde.
Su basular, şulay uq, Kuta, Legian häm Sanur yal itü töbäklärenä dä qağıla. Qotqaru törkemnäre su astında qalğan mäxällälärdän keşelärne êvakuatsiyaläw öçen rezin köymälär qullandı. Ülüçelär turında mäğlümat yuq.
Köçle yañğırlar Gianyar töbägeneñ ber öleşe bulğan Ubudta küp binalarğa häm cämğiyät ob'ektlarına zıyan kiterüçe cir şuışularına säbäp buldı.
Könçığış Karangasem töbägendä dä ağaçlar awuı häm yullarnıñ bozıluı kebek oçraqlar terkälde.
İndoneziyä Meteorologiyä, Klimat häm Geofizika agentlığı könyaq sularda dulqınnarnıñ dürt metrğa qadär kütärelergä mömkin ikänen häm bu xälneñ diñgez transportı häm balıqçılıq êşe öçen xätär buluın belderde.
Uzğan ayda Könbatış Yavadağı cir şuışu 70tän kübräk keşeneñ ülemenä säbäpçe bulğan ide.
Räsmi mäğlümatlarğa kürä, uzğan yıl noyabr' ayınıñ axırınnan birle İndoneziyäneñ Sumatra utrawındağı su basular, kimendä, 1 190 keşeneñ ülemenä, 141 keşeneñ yuğaluına häm meñnärçä keşeneñ yäşäw urınnarınnan kitüenä säbäpçe buldı.