İrlandiya premyer-ministrı Mixol Martin İzrail Ğazzägä oyıştırğan häm utnı tuqtatu kileşüen bozğan soñğı höcümnärne qırıs tel belän tänqıytläde.

“Ğazzädä barlığı 100 keşe ülgän höcümnärne tänqıytlim, alardan 46ısı - balalar. Barlıq yaqlarnı ut tuqtatu kileşüen ütärgä häm anı tormışqa aşırırğa çaqıram. Ğazzä xalqına gumanitar yärdämne arttırırğa kiräk,” - dip yazdı Mixol Martin çärşämbe kiçen X platformasında.

Şaqtıy ğayepsez keşe ülemeneñ bik qurqınıç buluın assızıqlağan premyer xalıqara xoquqnı xörmät itü zarurlığın qabatladı.

“Barlıq yaqlar üz östenä alğan yöklämälärenä tuğrı qalırğa häm plannıñ qalğan öleşlären çınğa aşıru öçen tırışlıq quyarğa tiyeş. Bolay da bik küp keşe qayğı-xäsrät kürde häm hälaq buldı,” - dip östäde Martin.

Anıñ bu belderüe Fälästinneñ sälamätlek saqlaw ministrlığı kürsätkeçlärenä kürä İzrail armiyase sişämbe kiçennän birle 46ısı bala bulğan 100dän artıq fälästinlene üterüe häm 10 oktäbrdän birle ğamäldä bulğan utnı tuqtatu kileşüen bozuı turındağı xäbärlärdän soñ yasaldı.

Yäkşämbe könne Netanyahu Ministrlar şurasında çığış yasap, AQŞ aradaşçılığı belän tözelgän kileşügä qaramastan İzrailneñ Ğazzädä qayda häm qayçan ut açaçağına üzeneñ qarar biräçägen äytkän ide.

Fälästinneñ sälamätlek saqlaw ministrlığı beldergänçä İzrailneñ soñğı höcümnärendä 253 keşe yaralandı. Alarnıñ 78e - balalar, 84e - xatın-qızlar.

Ministrlıq mäğlümatlarına qarağanda utnı tuqtatu kileşüe ğamälgä kerğännän birle İzrail höcümnärendä kimendä 211 keşe üterelde häm 597 keşe yaralandı.

2023 yılnıñ oktäbrennän birle Ğazzädä 68 meñnän artıq keşe yaqtı dönyadan kitte. 170 meñnän artıq keşe yaralandı.