Hindstannıñ Meghalaya provinŝiyasendäge kümer şaxtasında bulğan şartlawda hälaq buluçılar sanı 27 keşegä citte, êzläw-qotqaru êşläre däwam itä.

Däwlät teleradiokanalı “All India Radi”o xäbärlärenä kürä, provinŝiyaneñ Könçığış Jaintia Hills töbägendäge şartlawdan soñ başlanğan êzläw êşläre barışında tağın da küp mäyet tabılğan.

Monnan alda provinŝiya prem’yer-ministrı Konrad Sangma şartlawnıñ qanunsız êşläwçe kümer şaxtasında kilep çıguın belderde.

Sangma xökümätneñ älege fäciğä belän bäyle kiñ qırlı tikşerü başlatuın äytte. Poliŝiya tikşerü êşe açtı häm şartlawğa bäyläneşe bulğan ike keşene qulğa aldı.

"Tıçqan tişege" törendäge şaxtalar ğädättä taw bitlärenä qazılğan tirän qoyılarğa oxşıy.

Hindstannıñ federal’ êkologiya mäxkämäse 2014 yılda Meghalayada mondıy şaxtalarnı tıyğan ide. Säbäbe - cirle xalıqnıñ su resurslarınıñ pıçranuı turındağı şiqayätläre.

Şuña qaramastan bu şaxtalar ayıruça Könçığış Jaintia Hills rayonında häm bar provinŝiyadä kiñ qullanılışta qala birä.

Rayonnıñ poliŝiya başlığı Vikaş Kumar pänceşämbe könne beldergänçä, şartlaw zur ixtimal belän dinamit qullanu säbäple kilep çıqqan.