Misır düşämbe könne Qızıl diñgez buyında urnaşqan Şarm-äş-Şäyx şähärendä xalıqara tınıçlıq sammitın ütkäräçäk. Bu cıyılış belän Misır ilbaşı Ğabdelfättah äl-Sisi häm AQŞ liderı Donald Tramp citäkläyäçäk.
Misırnıñ İlbaşı idaräse şimbä kiçen belderü yasap, bu sammitnıñ 20dän artıq il citäkçesen cıyaçağın açıqladı.
Belderüdä sammit maqsatınıñ Ğazzädäge suğışnı tuqtatu, Yaqın Könçığışta tınıçlıq häm totrıqlılıq urnaştıru öçen tırışlıqlarnı arttıru häm töbäk iminlege belän totrıqlılığınıñ yaña çorın başlatu buluı äytelä.
Bu sammitnıñ AQŞ ilbaşı Trampnıñ töbäktä tınıçlıq urnaştıru vizionı häm dönyadağı bäreleşlärne beterü tırışlıqları nigezendä ütkärelüe dä citkerelde.
Tramp çärşämbe könne beldergänçä İzrail häm “Xamas” 29 sentäbrdä täqdim itelgän 20 maddälek plannıñ berençe öleşen qabul ittelär. Bu plan Ğazzädä utnı tuqtatunı, İzrail äsirläre öçen yaqınça 2000 fälästin totqının irekkä çığarunı häm İzrail köçläreneñ töbäktän äkrenläp çigenüen küzdä tota.
Plannıñ berençe öleşe comğa könne cirle waqıt belän köndezge 12:00dä ğamälgä kerde.
Planınıñ ikençe öleşendä Ğazzädä yaña citäkçelek mexanizmnarın buldıru, fälästinlelär häm Ğäräp-İslam illäre ğäskärilärennän toruçı iminlek köçlären buldıru häm “Xamas”nı qoralsızlandıru maqsatı bar.
2023 yılnıñ oktäbrennän birle İzrail höcümnärendä Ğazzädä kübese xatın-qızlar häm balalar bulğan 67 meñ 600dän artıq fälästinle üterelde häm töbäk yäşäw öçen yaraqsız xälgä kilde.
