İslam xezmättäşlek oyışmasınıñ Käşmir êlemtä törkeme BMOnıñ 80 nçe ğomum şurası qısalarında N’yu-Yorkta cıyıldı.

Hindstan idaräsendäge Käşmirdä xalıqnıñ üz yazmışın üze bilgeläw xoquqına yaqlawın yañartqan törkem may ayında Paqıstan belän Hindstan arasında 4 kön däwam itkän bäreleşlärdän soñ ireşelgän utnı tuqtatudan bik qanäğat’.

Paqıstan tışqı êşlär ministrlığı belderüenä qarağanda, BMOnıñ 80 nçe ğomum şurası qısalarında oyıştırılğan cıyılışta İslam xezmättäşlek oyışması ğomum  särqatibe belän bergä Äzärbaycan, Paqıstan, Törkiyä, Soğud Ğaräbstanı häm Nigerneñ tışqı êşlär ministrları häm yuğarı däräcäle wäkilläre qatnaştı.

Cıyılışta Kön’yaq Aziyädäge xärbi kiyerenkelekkä bäyle tirän borçılu citkerelde, töbäkne totrıqsızlıqqa kiterergä mömkin bulğan ğämällärdän çittä torırğa häm iñ yuğarı däräcädä tınıçlıqnı saqlarğa çaqırıldı.

Böten illärneñ aradaşçılıq tırışlıqların konstruktiv dip bäyälägän törkem Paqıstan belän Hindstan arasındağı utnı tuqtatudan qanäğat’.

 Atom - töş köçenä iyä ike däwlät arasında bulğan bäreleşlärdän soñ AQŞ ilbaşı Donal'd Tramp çik ar’yağı raketa höcümnärendä distälägän keşeneñ ğomere özelgännän soñ utnı tuqtatunı citkergän ide.

İslam xezmättäşlek oyışması törkeme töbäktä tınıçlıqnıñ Cammu belän Käşmir kileşmäwçänlegeneñ BMO İminlek şurası qararları häm Käşmir xalqınıñ iradäse nigezendä çişelüenä bäyle buluın assızıqladı.

Törkem Hindstannı säyäsi totqınnarnı irekkä çığaru, çikläwçe häm basım yasawçı qanunnarnı ğamäldän çığaru häm Cammu-Käşmir belän bäyle BMO İminlek şurası qararların tormışqa aşırırğa çaqırdı.

Yaña Dählidän isä İslam xezmättäşlek oyışması törkemeneñ belderüenä bernindi reakśiya bulmadı.