İran däwlät mediası Dini lider Ayätulla Ali Xamaneynıñ İzrail häm AQŞ höcümnärendä hälaq buluın citkerde. Bu belderüdän soñ İnqilab saqçıları üç alırğa çaqıru yasadı.

Däwlät televideniyese 1989 yıldan birle wazıyfada bulğan 86 yaşlek Xamaneynıñ ülemennän soñ ildä 40 könlek matäm häm cide könlek räsmi yal iğlan itelüen citkerde. Êfir waqıtında ber alıp baruçı: “Dini lidernıñ üleme belän anıñ yulı häm missiyäse yuğalmayaçaq häm onıtılmayaçaq. Kiresençä, zurraq täwäkkällek häm därt belän däwam itäçäk”, — dide.

İran İnqıylab saqçıları yasağan belderüdä Xamaneyneñ “üterüçeläre” cäzasın alaçağın belderde. Belderüdä: “İran milläteneñ üç aluı awır häm kisken bulaçaq”, — digän süzlär urın aldı.

İran mediası höcümdä dini lidernıñ qızı, kiyäwe häm onığınıñ da hälaq buluın citkerde. “Fars” xäbär agentlığı häm başqa media oyışmaları gailä äğzaläreneñ üleme turındağı mäğlümatnıñ ışanıçlı çığanaqlar tarafınnan raslanuın xäbär itte.

Tramp: “Bu barı İran xalqı öçen genä tügel, Xamaney häm anıñ törkeme ütergän yäki ğarip itep qaldırğan amerikalılar häm dönyanıñ küp kenä illärendäge keşelär öçen dä ğadellek,” — dide.

Netanyaxu isä videoyullamasında: “Bügen irtän oyıştırılğan köçle häm kötelmägän höcüm belän tiran Xamaneynıñ rezidensiyäsen yuq ittek,” — dide.

Höcüm yaqınnarı belän oçraşqan waqıtta buldı

AQŞnıñ ike çığanağı häm mäsälädän xäbärdar ber räsmi zat süzlärençä, İzrail häm AQŞ şimbä könne oyıştırılğan höcümne Xamaneyneñ yuğarı däräcäle yärdämçeläre belän ütkärgän oçraşuı waqıtına turı kiterep planlağan.

İzrail, Xamaney belän bergä, êlekkege Milli İminlek Şurası särqatibe Ali Şämxani häm İnqilab Saqçıları komandirı Möxämmäd Pakpurnıñ da üterelüen alğa sörä. İranlı ike çığanaq “Reuters” agentlığına Xamaneyneñ höcümnän alda Şämxani häm Yuğarı Milli İminlek Şurası särqatibe Ali Laricani belän imin ber urında oçraşuın äytte.

Yuğarı däräcäle ber İzrail räsmiye Xamaneyneñ mäyete tabıluın citkerde.

Tramp “Truth Social” xisabındağı yazmasında İran liderınıñ küzläw oyışması xäräkätlären açıqlannan soñ üterelüen belderde: “Küzläw oyışmabızdan häm zur üseş alğan küzätü sistemalarıbızdan qaça almadı. İzrail belän tığız xezmättäşlek ittek,” — dide.

İsemlären äytergä telämägän AQŞ çığanaqları citkergänçä, oçraşu mäğlümatı raslanuı belän hawa häm diñgez operatsiyäsen başlap cibärälär.

Operatsiyäneñ berençe êtapında Xamaneyneñ Tährandağı yuğarı saq astındağı rezidensiyäse utqa totıldı. “Reuters” agentlığı kürsätkän iyärçennän alınğan räsemnär rezidensiyäneñ yuq itelüen rasladı.