Xamaneynıñ İzrail häm AQŞ xärbi höcümnärendä üterelüe iğlan itelgännän soñ, yäkşämbe kön irtän il külämendä protestlar başlandı.
Bu waqıyğalar Yaqın Könçığıştağı kiyerenkelekne tağın da arttırdı häm İranda xalıqnıñ zur rizasızlığına kiterde. İran däwlät televideniyese irtänge säğatlärdä Xamaneynıñ AQŞ-İzrail höcümnärendä hälaq buluın rasladı häm “İslam inqıylabı liderınıñ şähadätkä ireşüen” citkerde.
Xökümät 40 könlek milli matäm iğlan itte häm cide könlek räsmi yal qararı çığardı. Xamaneynıñ üleme turındağı xäbärdän soñ, ilneñ küp şähärlärendä xalıq uramnarğa çıqtı. İran mediası İran bayraqları totqan demonstrantlarnıñ şähär märkäzlärenä cıyılıp qayğıların belderülären citkerde.
Tähranda yözärlägän keşe İnqıylab mäydanında berläşte. Alar Xamaneyneñ posterların kütärde häm AQŞ belän İzrailne gäyepläwçe şiğarlär äytte. İzge Qom şähärendä yözlägän keşe Xäzräti Mäsumä törbäsendä cıyılıp höcümnärgä qarşı protest belderde. Mäşhäd şähärendä isä matäm totuçılar, ilneñ iñ möhim dini urınnarınıñ berse bulğan İmäm Rıza törbäseneñ gömbäzenä qara bayraq asıp, simvolik matäm çarasın ütkärde. Törbä tiräsendä küp keşeneñ küz yaşläre tügüe kürende.
Xamaneynıñ gäilä äğzaläre dä ülde
Räsmi zatlar şimbä könne irtän ütkärelgän höcümneñ Xamaneynı Tährandağı ofisında bulğan waqıtta nişanğa aluın açıqladı. İran däwlät mediası anıñ cir astındağı yäşeren urında (bunkerda) buluı turındağı süzlärne kire qaqtı häm Xamaneynıñ höcüm waqıtında “wazıyfa başında häm xalıq arasında” buluın assızıqladı.
İran çığanaqları, Xamaneynıñ qızı, kiyäwe, onığı häm kilenen dä kertep, gäiläsenñ qayber äğzalarınıñ dä höcümnärdä hälaq buluın xäbär itte. Höcümnärdä tınıç xalıq ta hälaq buldı. İran Qızılayı höcümnär näticäsendä 201 keşeneñ ülüen, 747 keşeneñ yaralanuın açıqladı.
