BMO düşämbe könne İzrailneñ Ğazzägä açılğan barlıq ütü urınnarın yabuın häm İzrail köçläre yawlap alunı däwam itkän töbäklärdä gumanitar xäräkätne tuqtatuın belderde.
BMO süzçese Stefan Düjarrik matbuğat konferensiyäsendä: “İzrail räsmiläre Räfax kerü-çığu punktın da kertep barlıq ütü yolların yaptı häm Ğazzädä İzrail ğäskärläre urnaşqan urınnar tiräsendä gumanitar xäräkätne tuqtattı. Şulay uq, gumanitar xezmätkärlärneñ planlaştırılğan rotatsiyäsen dä kiçekterdelär,” — dip äytte.
Düjarrik, Ğazzädäge keşelärneñ daimi yärdämgä bäyle buluına basım yasap, bolay dide : “Näticädä, meditsina êvakuatsiyäläre häm Ğazzägä qaytu xäräkätläre dä tuqtatıldı. Belüegezçä, Ğazzä xalqı tışqı dönyadan kilgän daimi gumanitar häm komertsiyä tovarları ağımına bäyle. Saqlaw mömkinlekläre çiklängän häm suğıştan zur zıyan kürgän bu töbäktä, bez häm partnyorlarıbız kirtälärgä qaramastan totrıqlı tovar ağımın täêmin itärgä tırışabız, läkin tulı blokada şartlarında bu mömkin tügel,” — dip belderde.
Düjarrik mömkin qädär tizräk barlıq ütü urınnarınıñ yañadan açıluı zaruri buluın äytä. İzrail köçläre Yordannıñ basıp alınğan Könbatış Üzänlegendä dä küpçelek kontrol-ütü punktların yabıq totuın, bu xälneñ Fälästin şähärläre häm töbäkläre arasındağı xäräkätne çikläwen, xalıqnıñ yäşäw çığanaqlarına häm xezmätlärgä ireşüen qıyınlaştıruın citkerde.
Düjarrik süzlären bolay däwam itte: "Xalıqara gumanitar xoquq açıq häm añlayışlı. Här kön küp märtätä qabatlap äytkänebezçä, tınıç xalıq yaqlanırğa tiyeş, kirtäsez kerü, xäräkät itü häm gumanitar yärdäm taratunı da kertep, alarnıñ töp ixtiyaçları täêmin itelergä tiyeş."
Şimbä irtän AQŞ häm İzrail, İran "rejimı" tudırğan "yanawlarnı" yuq itü maqsatı belän, bu ilgä qarşı urtaq höcüm başladı. Bu höcümgä cawap itep İran töbäktäge İzrail häm AQŞ xärbi bazaların raketa häm keşesez hawa apparatları belän nışanğa aldı.
