Räsmi zatlar beldergänçä, Rusiyäneñ Ukraina külämendäge pilotsız oçu apparatları häm raketa höcümnärendä 6 keşe hälaq bulğan, distälägän keşe yaralanğan.
Kiyev töbäk xärbi administraśiyäse başlığı Nikolay Kalaşnik şimbä könne yasağan belderüendä töbäktäge ğadi toraq punktlarğa höcümnärdä 5 keşeneñ ülüen, 4 keşeneñ awır yaralanuın äytte.
Kalaşnik süzlärençä, höcümnär toraq yortlarğa, belem birü uçrejdeniyelärenä, êşxanälärgä häm möhim infrastrukturalarğa yünältelgän. “Bez 30 zıyan kürgän urın turında mäğ’lümat aldıq” dip belderde ul.
Ukraina däwlät başlığı Zelenskiy beldergänçä, Kiyev, Sumı, Xar’kov, Dnepr häm Nikolayev töbäklärendä êzläw-qotqaru häm cimereklärne çistartu êşläre däwam itä.
“Rusiyäneñ töp maqsatı Kiyev ölkäsendäge ênergetika infrastrukturası ide, läkin qızğanıç, ğadi yortlar, mäktäplär häm grajdanlıq êşxanäläre dä turıdan-turı höcümgä duçar buldı häm zıyan kürde”,- dide Zelenskiy.
Ukraina hava köçläre beldergänçä, Rusiya 430 pilotsız oçu apparatı häm 68 raketa oçırtqan, hawa saqlanu sistemaları alarnıñ 402sen häm 68en totqarlap qalğan.
Cirle xakimiyät mäğ’lümatına qarağanda, könneñ ikençe yartısında Zaporoj’ye yanındağı toraq punktqa oyıştırılğan Rusiya höcümendä 1 keşe hälaq bulğan, 18 keşe, şul isäptän 2 bala yaralanğan.
Tınıçlıq söyläşüläre tuqtap qaldı
4 yıldan artıq däwam itkän bäreleşne tuqtatunı maqsat itep quyğan häm Amerika Quşma Ştatları citäkçelegendä alıp barılğan tınıçlıq söyläşüläre AQŞ -İzrailneñ İranğa qarşı suğışı arqasında tuqtap qaldı.
Zelenskiy comğa könne yasağan belderüendä Yaqın Könçığıştağı waqıyğalar arqasında AQŞnıñ Rusiyä neftenä sankśiyälärne waqıtlıça yomşartuı Rusiyägä suğışnı finanslaw öçen yaña kerem birä ala digän borçılu belderde.
