İran xökümäte comğa könne ildäge yäşäw bäyäseneñ yuğarı buluına qarşı oyıştırılğan, meñnärçä keşeneñ ülemenä kitergän häm soñınnan xökümätkä qarşı demonstratsiyälärgä äylängän protestlarnı tikşerü öçen maxsus komissiyä tözelüen belderde.

İran xökümäte süzçese Fatıyma Moxacerani cirle ISNA xäbär agentlığına yasağan belderüendä: "Tiyeşle oyışmalardan wäkillär kergän tikşerü komissiyäse tözelde häm bu komissiyä dokumentlar cıyıp, şahitlärneñ kürsätmälären tuplıy", - dide.

Süzçe komissiyäneñ barı protestlarnı tudırğan iqtisadi taläplärgä genä iğtibar itäçäkme, yäisä protestlar waqıtında bulğan ülemnärne dä tikşeräçäkme-yuqmı ikäne turında açıq mäğlümat birmäde.

Moxacerani: "Protsess tämamlanğannan soñ nıhayat' xisap cämğıyätkä açıqlanaçaq häm başka qanunıy çaralar küreläçäk", - dide.

Pänceşämbe könne xökümätneñ internet säxifäsendä İlbaşı Mäsud Päzäşkiyannıñ "Waqıyğalarnıñ säbäplären öyränü öçen törkemnär buldırdıq" digän süzläre basıldı, läkin tulıraq mäğlümat birelmäde.

Dekabr' ayı axırlarında başlanğan häm 8 ğıynwardan soñ köçäygän protestlar, räsmi mäğlümatlar buyınça, 3000nän artıq keşeneñ ülemenä kiterde.

İran räsmi zatları hälaq bulğan keşelärneñ zur küpçelegeneñ İzrail häm AQŞ öçen êşläwçe "terrorçılar" tarafınnan üterelgän iminlek köçläre yäki tınıç xalıq buluın alğa sörä.

Läkin İran tışında êşläwçe keşе xoquqların yaqlawçı törkemnär iminlek köçläreneñ protestçılarnı maqsat itep aluın belderä.

AQŞtağı Keşе Xoquqları Aktivistları Xäbär Agentlığı (HRANA) protestlarnıñ iñ köçle waqıtında, kim digändä, 7005 keşeneñ üterelüen belderä.