Franśiyädä urnaşqan “EuroPalestine” cämğıyäte basıp alınğan Yordannıñ könbatış üzänlegendäge qanunsız İzrail cirlärendä citeşterelgän häm Franśiyädä satılğan xörmälärgä boykot belderergä çaqırdı.

Fälästin xoquqların yaqlawçı cämğıyät’ möselmannarnıñ xörmä qullanuı sizelerlek däräcädä artqan izge Ramazan ayında İzrail produktların boykotlarğa çaqıruın däwam itte.

Cämğıyät’ başlığı Olivia Zemor çärşämbe könne yasağan belderüendä Franśiyädä satılğan “Medjool” markalı xörmälärneñ zur öleşe izraillelär qanunsız kilep urnaşqan cirleklärdän yäki basıp aluda qatnaşqan  şirkätlärdän kilä dip äytte.

Zemor süzlärenä qarağanda, qayber tartmalarda citeşterü ile bularaq Yordaniya yäki Marokko kürsätelä, ämma produktlar çınlıqta İzraildän.

Zemor boykot kampaniyäse qısalarında qayber üzixtiyarıylarnıñ qullanuçılarnı xäbärdar itü maqsatında supermarketlarda añlatu êşçänlege alıp baruın häm maqsatlarınıñ al’ternativ produktlar qullanuğa täşwiq’ itü buluın belderde.

Zemor äytüençä, Franśiya qağıydälärenä kürä satuçılar bigräk tä kipterelgän  ciläk – cimeşlär öçen, citeşterüçe ilne açıq kürsätergä tiyeş, basıp alınğan Fälästin cirlärennän kilgän produktlarnıñ “İzrail” dip kürsätelä almawın assızıqladı.

Zemor şulay uq bu produktlarnı boykot itüneñ İzrail iq’tisadına tiskäre yoğıntı yasayaçağın belderep, qayber küpmillätle azıq-tölek şirkätläreneñ dä boykot maqsatları arasında buluın östäde.

 İzrailneñ Ğazzägä qarata genośid sıyfatındağı suğışı 2023 yılnıñ oktyabrennän birle kübese xatın-qız häm balalar bulğan 72 meñnän artıq fälästinleneñ ülemenä häm 171 meñnän artıq keşeneñ yaralanuına kiterde.

Ğazzädäge Fälästin sälamätlek saqlaw ministrlığı mäğ’lümatlarına qarağanda, oktyabr’dä utnı tuqtatu iğ’lan itelügä qaramastan, İzrail köçläre bombalı höcümnär oyıştırıp häm ut açıp yözlägän tapqır kileşüne bozdı.

Bu höcümnärdä dä 603 fälästinle hälaq buldı, 1.618 keşe yaralandı.