Qazaqstan ilbaşı Qasıym Comart Toqayev Germaniya belän barlığı 2 milliard dollarlık säwdä kileşülärenä qul quyuların belderde.
Qazaqstan İlbaşı idaräsennän yasalğan belderügä kürä Germaniyägä räsmi säfär belän kilgän Toqayev başqalä Berlinda Germaniya Kanślerı Fridrix Merś belän oçraştı.
Oçraşuda yaqlar Qazaqstan belän Germaniya arasındağı küp qırlı xezmättäşlekne nıgıtuğa qarağan niyätlären belderde.
Taraflar ike il arasındagı xezmättäşlekne sänäğät, zur ähämiyätkä iyä minerallar, transport häm logistika, sanlı texnologiyalär, texnika häm ximiya sänäğäte kebek yuğarı östämä qıymmätle citeşterü ölkälärendä üsterü öçen möhim potenśial bar dip bilgeläde.
Yaqlar şulay uq "Urta Aziya-Germaniya" formatı belän bergä, xalıqara oyışmalar qısalarındağı xezmättäşlekne arttıruda kileşte.
30dan artıq säwdä kileşüe imzalandı
Toqayev häm Merś oçraşulardan soñ matbuğat konferentśiyase ütkärde.
Qazaqstan liderı Toqayev yasağan çığışında barlığı 2 milliard dollarlık 30dan artıq säwdä dokumentınıñ imzalanuın belderde.
Toqayev şulay uq, säfär qısasında uzdırılaçaq Qazaqstan-Bavyera Texnologiya forumında qatnaşaçağın da açıqladı.
Merśnı Qazaqstanğa çaqırdı
Oçraşularda töbäk häm dönya külämendäge täraqqıyätlär dä qaraldı dip beldergän Toqayev, här nizağnı tınıç häm diplomatik yullar belän çişü kiräklegenä basım yasadı, monı ike ilneñ urtaq totışı dip äytte.
Yaqlarnıñ 'Urta Aziya-Germaniya' formatındagı dialognı üsterüdä dä kileşüen assızıqlap, Toqayev Qazaqstannıñ Germaniya belän ozın möddätle, ike yaqlı faydağa nigezlängän häm konkret näticälärgä yünälgän strategik partnyerlığın nıgıtunı maqsat itüen bilgeläde.
Söyläşülärdän soñ Toqayev Germaniya Kanślerı Merśnı Qazaqstanğa çaqırdı.
Toqayev şulay uq Germaniya liderı Frank-Valter Ştaynmayer belän dä oçraşu ütkärde.
