Törkiyä ilbaşı Räcäp Tayyip Ärdoğan İzrailneñ Doxa şähärendä kileşü törkemenä höcüm yasawın "qurqaqlarça höcüm" dip atadı häm monı "xalıqara sistemaga häm qanunğa açıq çaqıru" dip bäyäläde. Bu höcü, İzrailneñ Ğazzä, Süriyä, Livan, Yämän häm İranğa höcümnärennän soñ buldı.
“Bu höcüm İzrailneñ okkupatsiyä mentalitetın häm terroristik säyäsäteneñ däräcäsen tağın ber märtäbä kürsätte,” – dip belderde Ärdoğan sişämbe könne, Doxa şähärendä ütkän Ğäräp-İslam ğadättän tış sammitınnan qaytqaç jurnalistlarğa.
İlbaşı Törkiyäneñ Qatar häm Fälästin xalqı belän nıq toruın assızıqladı, ülgännär öçen qayğı urtaqlaşu belderde häm yaralanuçılarğa tizräk sawığu teläde.
Ul şulay uq, ğadättän tış sammitnıñ İslam dönyasınıñ İzrail agressiyäsenä qarşı berdäm pozitsiyäsen kürsätüen äytte, häm citäkçelär Tel-Aviv belän mönäsäbätlärne küzdän kiçerü kebek östämä diplomatik häm iqtisadi çaralar turında uylaw turında kileşte.
Ul sammit näticäläreneñ İzrail agressiyäseneñ Fälästinne genä tügel, barlıq möselman illären maqsat itep aluın assızıqlawın äytte, häm anıñ ğamällären tuqtatu öçen "barlıq mömkin xoquqi häm täêsirle çaralar" qabul itü kiräklegen belderde.
Ärdoğan BMO ğomum şurasınıñ küptän tügel Nyu-York deklaratsiyäsen 142 tawış belän qabul itüen xupladı häm monı ike däwlät çişeleşe öçen diplomatik tırışlıqlarda borılış noqtası dip bäyäläde.
“Bu İzrailneñ tağın da izolyatsiyälänüen häm Törkiyäneñ pozitsiyäsen dönyada tanıluın kürsätä,” – dip äytte ul.
“Yalğan ssenariylar”
Regional kiyerenkeleklärgä qağılışlı, Ärdoğan "wägdä itelgän cir" iseme astında çiklären yañadan bilgeläw turındağı "yalğan ssenariylar"nı kire qaqtı. Monıñ xoquqi yaqtan da, äxlaqi yaqtan da döres tügellegen, häm İzrailneñ "radikal häm faşist ideologiäsen"ä genä xezmät itüen äytte.
Ul, şulay uq, İzrail citäkçelegeneñ radikal ideologiyäne "faşist üterü çeltäre"nä äyländerüen, häm bu möselmannarğa, xristiannarga häm yähüdlärgä dä qurqınıç tudıruın belderde.
Ärdoğan İslam illären belem, xezmättäşlek häm berdämlek belän cawap birergä çaqırdı.
“İzrailneñ genotsidına qarşı bulğan yähüdlärne tıñlağanda, sionizm ideologiyäseneñ niqädär qurqınıç buluın açıq kürä alasız. Ägär sionist İzrailneñ nindider närsä belän bäyläneşe bulsa, ul terrorizm häm faşizm belän bäyle,” – dip belderde ul.
İlbaşı Ärdoğan Änkaranıñ "Fälästin êşe" öçen "bayraq kütärüçe" bulıp qaluın rasladı, häm Törkiyäneñ töp maqsatı töbäktä tınıçlıq, ğadellek häm keşelek däräcäsen täêmin itü buluın assızıqladı.
