Berläşkän Millätlär Oyışmasınıñ diñgez agentlığı bulğan Xalıqara diñgez oyışması şişämbe könennän birle Ormuz buğazınnan yaqınça 115 korab häm 2500 diñgezçeneñ êvakuatsiyälänüen xäbär itte.

Oyışmanıñ citäkçese Arsenio Dominges comğa könne bolay dip belderde: "Soñğı öç yarım kön êçêndä bez, kim digändä, 115 korabnı êvakuatsiyäli aldıq. Bu korablardağı yaqınça 2500 diñgezçe Ormuz buğazınnan qurqınıçsız räweştä çıqtı".

Dominges üze birgän sannarnıñ äle tögäl tügellegen häm comğa irtäsendä bulğan teläsä nindi çik aşa ütü oçraqların tikşerü öçen waqıt kiräklegen belderde.

Törkiyä ransport häm asqorma ministrı Abdulqadıyr Uraloğlu töbäktä kötep torğan Törkiyägä qarawçı barlıq korablarnıñ da êvakuatsiyälängännär arasında buluın citkerde.

Ul barlığı 99 törek xezmätkären yörtüçe 15 korabnıñ töbäktän isän-imin kitüen äytte.

Xalıqara diñgez oyışması pänceşämbe könne Oman qultığında korabqa höcüm bulğannan soñ, Ormuz buğazında qalğan diñgezçelärne êvakuatsiyäläw planın tuqtatuın iğlan itte.

Dominges pänceşämbe könne “X” sotsial’ media platforması aşa bolay dip belderde: "Bügen miña Oman qultığında höcüm buluı turında xäbär ittelär. Diñgezçelärneñ iminlege bezneñ öçen iñ möhim burıç bulıp qala".

Böyekbritaniyä diñgez säwdä operatsiyäläre üzäge pänceşämbe könne Oman yarı yanındağı yök korabına bilgesez snaryad bärelüe häm küpergä zıyan kilüe turında xäbär itkän ide. Bu waqıyğada ülüçelär, yaralanu oçraqları yäki äylänä-tirä moxitkä zıyan kilüe xaqında belderelmäde.