BMO ğomum särqatibe Antonio Guterriş İran räsmilären protestlarğa qarata "çiktän tış sabırlıq" kürsätergä häm "kiräksez yäki proportsional' bulmağan" köç qullanudan tıyılırğa çaqırdı.
Matbuğat särkätibe Stefan Dujarrik yäkşämbe köne yasağan belderüendä: "Ğomum särqatib İran islam cömhüriyäteneñ törle töbäklärendä demonstrantlarğa qarşı İran räsmiläre tarafınnan qullanılğan qatı köç häm çiktän tış zolım turındagı xäbärlärgä häm monıñ küp sanda keşeneñ ülüenä kiterüenä tirän qayğırdı", — dide.
Guterriş barlıq iranlılarnıñ "şiqayätlären" qurqusız räweştä häm tınıç yul belän citkerä alırğa tiyeşlegen basım yasap äytte. Ul xalıqara xoquqta garantiyälängän süz irege, cämğıyätlär qoru häm tınıç cıyılışlar uzdıru xoquqlarınıñ "tulıısınça xörmät itelüe häm saqlanuı" kiräklegenä iğtibar itte.
Ğomum särqatib, şulay uq, êlemtä xezmätlären yañadan torğızunı da kertep, ildä mäğlümatqa ireşüne täêmin itüçe adımnar yasarga çaqırdı.
Londondağı internet-monitoring törkeme “NetBlocks” yäkşämbe köne beldergänçä, il külämendä internet özeklegeneñ dürtençe könenä kergändä, İran 72 säğattän artıq "off-line" (çeltär tışında) qaldı.
Protestlar 28 dekabr'dä Tährannıñ Zur Bazarında İran rialınıñ kisken qimmäten yuğaltuı häm naçarayğan iqtisadi şartlar arqasında başlandı häm soñınnan berniçä şähärgä cäyelde.
AQŞtağı keşe xoquqları törkeme HRANA 490 demonstrant häm 48 iminlek xezmätkäreneñ hälaq buluın, 10 600dän artıq keşeneñ qulğa alınuın belderde. Ülüçelär turında räsmi mäğlümat isä yuq.
