Yaponiyäneñ êlekke prem’yer-ministrı Sindzo Abêne üterüdä ğayeplängän keşe Yaponiya häm dön’yanı teträndergän bu cinayät’tän öç yıl uzğaç sişämbe könne üz ğayeben tanıdı.

45 yäş’lek Têśuya Yamagami 2022 yılnıñ 8 iyülendä Nara şähärendä saylaw kampaniyäse waqıtında yasağan çığışında Abêgä öydä yasalğan qoral belän atuın mäxkämä aldında tanıdı.

Cirle matbuğattağı xäbärlärgä qarağanda, Yamagami mäxkämädä “Bar da döres” dip äytkän.

Ul cinayät’ qıluda häm Yaponiyäneñ qorallar kontrole zakonın bozuda ğayeplänä.

“Berläşü çirkäwe belän bäyläneşe bulğan öçen üterelde”

Yaponiyäneñ iñ ozaq waqıt wazıyfa başqarğan prem’yer-ministrı bulğan Sindzo Abê parlament saylawları aldınnan saylawçılarğa möräcäğat’ itkän çaqta atıp üterelde.

Cinayät’ däräcäse bik tübän häm qoralğa bäyle zakonnar bik qatı bulğan ildäge älege höcüm milli matämgä säbäp buldı häm säyäsi iminlekkä qağılışlı sorawlar tudırdı.

Prokurorlar äytüençä, Yamagami êlekke prem’yer-ministrnıı şunıñ öçen nişan itep saylağan — imeş Abêneñ änise Berläşü çirkäwe belän êlemtädä bulğan häm bu oyışmağa zur külämdä aqça belän yärdäm itep ğailäne bölgenlekkä töşergän.

Bu däğ’wa Yaponiyädä räsmi iseme Dönya tınıçlığı häm Berläşü öçen Ğailä federaśiyäse dip atalğan çirkäwneñ säyäsätkä täêsire turında cämäğat’çelektä qabat bäxäslär uyattı häm xökümätne bu çirkäw turında tikşerü başlarğa, aña qarşı mäxkämä êşlären quzğatuğa êtärde.

 Abêneñ cenaza cıyını üterüdän berniçä kön uzğaç Tokiodağı ğıybadätxanädä uzdı — meñlägän keşe uramnarda safqa tezelep märxüm liderğa ixtiram kürsätte.

Yaponiya qanunnarına kürä, ägär Yamagami ğayeple dip tabılsa, anı mäñgelek törmä yäki ülem cäzası kötä.