Rusiyä tışqı êşlär ministrı urınbasarı Sergey Ryabkov Rusiyäneñ AQŞ häm Ukraina belän öçyaqlı sammit uzdırıluın kötmäwen, tik Mäskäw belän Vaşingtonnıñ bu yıl ikeyaqlı söyläşülär ütkärä alaçağın belderde.
Räsmi xäbär agentlığı TASS belän äñgämädä ul Rusiyä tışqı êşlär ministrı Sergey Lavrov häm AQŞ däwlät särqatibe Marko Rubionıñ N’yu-Yorkta bulaçaq BMO ğomum şurasınıñ 80nçe utırışında küreşä aluın äytte. “Oçraşunı oyıştıru prośessı turında söyläşülär bara. Monıñ buluı ixtimalı zur”,-dide Ryabkov.
Ministr urınbasarı Kiyevnıñ iyül ayında İstanbulda uzğan öçençe tur Rusiyä-Ukraina söyläşüläre waqıtında kertelgän öçyaqlı format täqdimenä älegä cawap qaytarmawın da süzlärenä östäde.
Ryabkov “ber cirdä taptanun urınına konkret alğa kiteş kürergä telibez” dide häm Mäskäwneñ mondıy tördäge söyläşülärne köz axırına qadär tormışqa aşırunı ömet itüen äytte.
Ryabkov Awrupada Rusiyä belän söyläşülärgä qarşı çığuçı häm “Rusiyäne tezländerergä” teläwçe “ayawsız militarist”larnı tänqıytläde häm bu keşelärneñ tağın da ayıq aqıllı fikerlär citketüçe tawışlarnı basıp kitüen söyläde.
