“Miña yala yağunı tuqtatığız”

Yäkşämbe könne Kolumbiya ilbaşı Gustavo Petro AQŞ ilbaşı Trampnıñ narkotiklar kontrabandası ğayepläwlären häm yanawların kire qaqtı.

Şimbä irtäsendä Amerika köçläre Karakasqa höcüm itte.

Venesuêla liderı Nikolas Maduronı xakimiyättän çitläşterü häm Vaşingtonnıñ neft’kä bay Kön’yaq Amerika ilendä kontrol’ täêmin itü maqsatınnan ildäge xärbi ob’yektlar bombağa totıldı.

Yäkşämbe könne ilbaşı oçqıçında jurnalistlar belän söyläşkän Tramp Kolımbiyägä qarata da şundıy uq xärbi operaśiyälär ütkärelergä mömkin dip äytte.

“Bu Kön’yaq Amerika ile awıru häm kokain citeşterep anı AQŞqa satarğa yaratqan awıru keşe tarafınnan idara itelä”,- dide.

Tramp Gustavo Petronı küzdä totıp, “Anıñ kokain êşxanäläre bar, läkin ul monı ozaq êşli almayaçaq” dip äytte.

Kolumbiyädä dä Venesuêladağı kebek xärbi operaśiya planlaştırılamı digän sorawğa Tramp “Bu miña yaxşı fiker kebek toyıla” dip cawap birde.

Petro ğayeplawlärne kire qaqtı, mäxkämälärdä iseme terkälmäwen äytte.

Petro “X” sośial’ media platformasında “Miña yala yağunı tuqtatığız Tramp äfände” dip yazdı.

“Sez qorallı köräş annarı Koloumbiya xalqınıñ tınıçlıq öçen köräşe aşa kürenekle bulğan Latin Amerikası ilbaşına yanıy almıysız” dip östäde.

Petro Tramp citäkçelegeneñ töbäktäge xärbi ğamällären kisken tänqıyt’läde häm Vaşingtonnı Maduronı xoquqıy nigezsez urlawda ğayepläde.

Petro yäkşämbe könne “X” platformasında “Duslar bombalar taşlamıy” dip yazdı.

Kolumbiya tışqı êşlär ministrlığı AQŞ ilbaşınıñ yanawların qabul itelmäslek tıqşınu dip atadı häm üz illärenä xörmät kürsätüne taläp itte.

Kolumbiya häm AQŞ töbäktä möhim xärbi häm iq’tisadıy berlektäşlär bulsa da, alar arasında mönäsäbätlär kiyerenke.

İke lider Trampnıñ ikençe ilbaşı çorı başlanğannan birle tamğaxanä salımnarı häm migraśiya säyäsäte kebek mäs’älälärdä kileşä almıy.