“Kiläçäktä köräş su öçen bulaçaq”

Törkiyä ilbaşı Räcäp Täyyip Ärdoğan uzğan ğasırda neft’ häm uglerod yağulığı öçen alıp barılğan köräşneñ kiläse çorda su ölkäsendä bulaçağın äytte.

Däwlät Su êşläre ğomum mödirlege tarafınnan tözelgän yaña qorılmalarnı açu tantanasında qatnaşqan Ärdoğan klimat üzgäreşe, qorılıq, xalıq sanı artu, ğadättän tış şähärläşü häm sänäğat’läşü kebek faktorlar arqasında kilep çıqqan problemalarnıñ su resurslarına basımnı arttıruın assızıqladı.

İlbaşı dön’yada 2,2 milliard keşeneñ êçärgä yaraqlı suğa ireşä almawın, Bötendön’ya Su üseşe xisabında  2050 yılğa qadär yaqınça 6 milliard keşeneñ citärlek çista suğa ireşä almayaçağı farazlanuın  bilgeläp ütte.

“Här ölkädä köç köndäşlege köçäyä barğan ğasırda iñ strategik häm iñ qıymmätle resurs – su, ul şulay uq citeşterü häm ênergiyäneñ dä töp êlementı”, – dide ilbaşı.

Ul Törkiyä tiräsendä barğan qaynar konfliktlarğa qarağanda, monıñ bilgelären xäzerdän ük kürep buluın äytte.

Ärdoğan döny’adağı su resurslarınıñ barı tik 2,5%ınıñ ğına töçe su buluın häm dön’yada 1960 yılda 3 milliard bulğan xalıq sanınıñ  bügenge köndä 8 milliardtan artuın, ämmä yawım-töşem külämeneñ üzgärmäwen assızıqladı.

 Ärdoğan: “Çista su resurslarına ixtıyac artqanda tiz qullanu häm pıçranu arqasında  qullanıla torğan su çığanaqları, qızğanıç, bik tiz kimi bara”,- dip belderde.