AQŞ ilbaşı Donald Tramp migraŝiya säyäsäten qırıslaştırudan cawaplı bulğan Êçke iminlek ministrlığı başlığı Kristi Noêmnı wazifasınnan azat itte.
Tramp pänceşämbe könne “Truth Social” çeltärendä yasağan belderüendä Oklaxoma ştatınnan Cömhüriyätçe senator Markwayne Mallinnıñ 31nçe martta Noêm urınına Êçke iminlek ministrlığı başlığı itep bilgelänäçägen äytte.
Tramp 54 yaşlek Noemnıñ, Könbatış yarımşarda "Amerika Qalqanı" dip atalğan yaña iminlek iniŝiativasınıñ maxsus ilçese bulaçağın belderde.
Tramp: “Noem bezgä yaxşı xezmät itte häm (ayıruça çiktä!) artıq küp häm iskitkeç näticälär kiterde," — dide.
AQŞ liderı Mallinnı "MAGA suğışçısı" dip atap, anıñ iskitkeç Êçke iminlek ministrı" bulaçağın äytte.
Mallinnıñ kandidaturası, Cömhüriyätçelär küpçelekne täşkil itkän Senat tarafınnan raslanırğa tiyeş.
Trump: "Markwayne, çiklärebezne imindä totu, möhacir cinayätlären, keşe üterüçelärne häm başqa cinayätçelärne qanunsız yullar belän ilebezgä kerüdän tuqtatu, qanunsız narkotik bälasın yuq itü häm AMERİKANİ TAĞIN DA İMİN İTÜ öçen armay-talmıy êşläyäçäk," — dip belderde.
Törle media xäbärlärenä qarağanda, Tramp bu atnada Senatta ütkän utırışta Noemnıñ birgän kürsätmälärennän qänäğät bulmağan. Noem AQŞ ilbaşınıñ, üze dä töp roldä bulğan 220 million dollarlık Êçke iminlek ministrlığı reklama kampaniyäsen raslawın äytkän bulğan.
