Filippinda Kalmaegi tayfunında ülüçelär sanı 90nan arttı, bigräk tä Sebu provinśiyase zur zıyan kürde. Bu soñgı yıllarda iñ köçle su basularnıñ berse buldı.
Provinśiyaneñ şähärläre häm avıllarında maşinalar, yılğa buyındağı yortlar häm zur konteynerlar suğa quşılıp ağıp kitte.
Çärşämbe könne Sebu süzçese Ron Reymos “AFP” agentlığına Liloan şähärendä 35 mäyetneñ tabıluın belderde.
Milli grajdanlılarnı saqlaw idaräse başlığı urınbasarı Rafaêlito Alexandro başqa provinśiyälärdä kimendä 17 keşeneñ ülüen rasladı.
“Su basular şähärlärgä zıyan kiterde,” - dip añlattı Alexandro cirle radioğa birgän intervyuda häm 26 keşeneñ haman da tabılmawın äytte.
Sişämbe könne provinśiya gubernatorı Pamela Barikuatro bu xälne tiñe kürelmägän dip atadı. “Cillär qurqınıç bulır dip kötkän idek, ämma su basu keşelärgä zur zıyan saldı. Su basularnıñ çınnan da cimerä torğan köçe bar,” - dip belderde ul jurnalistlarğa.
Belgeçlärgä kürä klimat üzgäreşe köçle dawıllar kiterep çığara. Cılınğan okeannar häm hawa arqasında tağın da köçle cillär häm yawım-töşermnär kötelä.
Yaqınça 400 meñ keşe tayfun küreläçäk urınnardan êvakuaśiyalände.
Xärbi boralaq qazası
Filippin armiyase sişämbe könne yärdäm kürsätü öçen cibärelgän dürt boralaqtan berseneñ Mindanao utrawı tönyağında töşüen belderde.
“Super Huey” boralağı köçle dawıl belän bäyle yärdäm operaśiyälärenä bulışu öçen Butuan yar buyı şähärenä barışlıy töşkän dip belderde Könçığış Mindanao citäkçelege üzeneñ belderüendä.
Hawa köçläre süzçese, polkovnik Mariya Kristina Basko xärbilär tarafınnan altı keşe mäyeteneñ tabıluın xäbär itte. “Şäxes tanıqlıqların raslaw öçen sudmed êkspertiza näticälären kötäbez,” - dip añlattı ul jurnalistlarğa, boralaqta ike pilot häm dürt êkipaj äğzası buluın östäp.
Çärşämbe irtän 11:00dä tayfun Palawannıñ turist töbäklärenä taba sägätenä 130 çaqrım tizlek belän yul tota ide. Cilneñ tizlege sägätenä 180 çaqrımğa citte.
Filippinda yıl sayın urtaça 20 dawıl häm tayfun küzätelä häm küpçelek yarlılıqta yäşäwçe töbäklärgä zıyan kiterä
Filippin sentäbr ayında ike zur dawıl kiçerde, şular arasında super tayfun Ragasa yaqındağı Tayvanda 14 keşeneñ ğomeren özde, bina tübälären alıp taşladı.
