AQŞ Rusiyäneñ iñ zur ike neft citeşterüçese “Rosneft” häm “Lukoil” şirkätlärenä häm alarnıñ filiallarına yaña sanktsiyälär kertkäç, alarnıñ bazar bäyäse $5.2 milliardka kimede .
“Rosneft” aksiyäläre comğa kiç 3 protsentka kimep 4.19 dollarga töşte, kön däwaminda 4.12 dollarğa qadär arzanayıp 2023nçe yılnıñ may ayınnan birle iñ tübän däräcä ireşte. Bu isä şirkätneñ bazar bäyäsennän 127 milliard sumnı yuq itte.
“Lukoil” aksiyäläre ike kön êçendä 7.2 protsentka töşte häm 3.66 milliard dollar yuğalttı.
“Lukoil”nıñ töp aksionerı, milliardär Wahit Alekperov şirkätneñ 28 protsent öleşenä iyä. Bazar mäğlümatlarına kürä, ike kön êçendä ul 1 milliard dollardan artıq aqçasın yuğaltqan.
Analitiklar äytüençä, Donald Tramp qabat AQŞ ilbaşı bulğannan soñ berençe tapqır kertelgän bu sanktsiyälär Rusiyäneñ ênergiä sektorın tağın da zäğıyflätergä mömkin.
“Moscow Times” xäbär itkänçä, “Astra Asset Management”tan investitsiyä direktorı Dmitriy Polevoy: “Êksport küläme kimi ala, logistikalar yañadan qorıla, häm Rusiyä neftenä taşlamalar kiñäyäçäk,” – dip belderde.
“"Alfa Bank” analitikları “Rosneft” häm “Lukoil”nıñ çit il partnerları sanı, ikençe däräcä sanktsiyälärdän qurqu säbäple kimi ala, bu isä Hindstan häm Berläşkän Ğäräp Ämirlekläre kebek töp bazarlarga täêminatnı özärgä mömkin, dip kisätä.
Soñğı sanktsiyälärgä qadär ük zur finans krizis bilgeläre kürenä: 2025 yılnıñ berençe yartısında “Rosneft”nıñ kereme öç tapqır, ä “Lukoil”nıñ kereme yartılaş kimi.
“Alor Broker” analitikları kiläçäktäge bazar yoğıntısınıñ AQŞnıñ Rusiyä neft ağımına xezmät itüçe banklarnı maqsat itep aluına bäyle bulaçağın belderä. “Çit il bankları formal räweştä Rusiyä şirkätlärenä tüläwlärne başqarmasqa mömkin, çönki neft ğadättä traderlar aşa satıla,” – di alar.
Comğa könne “Rosneft” häm “Lukoil” aksiyäläre Mäskäw birjasında iñ zur töşüçelär buldı.
Rusiyäneñ iqtisadi wäkile AQŞta
Şul uq waqıtta, Vaşington Mäskäwneñ iñ zur ike neft şirkätenä sanktsiyälär kertkännän soñ ike kön uzğaç Rusiyäneñ töp iqtisadi wäkile comğa könne AQŞqa söyläşülär öçen kilüe turında belderde,
Bu säfär AQŞnıñ Rusiyä ilbaşı Vladimir Putinnıñ yaqınça dürt yıl däwam itkän Ukraina suğışın tuqtatuğa rizalaşudan baş tartuına qarata açuı artqan waqıtqa turı kilä.
Bu atnada AQŞ ilbaşı Donald Tramp Budapeştta Putin belän planlaştırılğan söyläşülärne “waqıtnı buşqa uzdırmaw öçen” dip ğamäldän çığardı.
“AQŞ-Rusiyä dialogın däwam itü öçen AQŞqa kildem – säfär AQŞ yağı çaqıruı nigezendä aldan planlaştırılğan ide,” – dip belderde Putin administratsiäseneñ iqtisadi wäkile Kirill Dmitriev “X”ta.
Wäkil Rusiyä mäğlümat agentlıklarına AQŞ administratsiyäse wäkilläre belän oçraşularda Ukraina suğışı turında Rusiyäneñ pozitsiyäsen citkeräçägen äytte.
“Ukraina, qızğanıçqa qarşı, zaruri dialognı özä häm monı qabat Britaniyä häm awrupalılar taläbe buyınça êşli, alar isä konfliktnı däwam itärgä teli,” – dide ul däwlät agentlığı “TASS”qa.
Êlekkege “Goldman Sachs” bankirı häm Stanford universitetı tämamlağan Dmitriev sanktsiyälärneñ kire täêsir yasayaçağın häm ğadi amerikalılar öçen benzin bäyälären arttıraçağın äytte.
“Rusiyä belän iqtisadi xezmättäşlek mömkinlege äle dä bar, läkin bu Rusiyäneñ mänfäğätlärenä xörmät belän qaralğan oçraqta ğına,” – dip östäde ul.
