AQŞtağı qar buranında ülüçelär bar
Buran arqasında xäzergä qädär 16 meñnän artıq reys ğämäldän çıqarıldı
AQŞnıñ könçığış häm könyäq ştatlarında qar buranı küzätelä. Buran arqasında aêroportlar häm avtoyullar yabılğan, ber millionnan artıq keşe utsız qalğan, kim digändä altı keşe ülgän.
Yäkşämbe könne küp sandağı media çaraları burannıñ küp ştatlarda hawa temperaturasın minuslarğa töşerüen xäbär itte.
Xäzergä qädär iñ küp zarar kürgän ştatlar: Djordjiya, Luiziana, Mississipi, Tennessi häm Texas buldı.
Cıyılğan bozlar êlektr liniyälären özde, bu da ut betügä häm Atlanta, H’yuston, Naşvil kebek zur şähärlärdä tormışnıñ tuqtap qaluına säbäpçe buldı. Bu şähärlärdäge küpçelek oyışmalar häm mäktäplär xalıq sälamätlegen saqlaw çarası bularaq üz êşçänleklären tuqtattı.
AQŞ külämendä êlektr özelülären küzätep baruçı “PowerOutage.us” säxifäse mäğlümatlarına qaraganda özelülär iñ küp küzätelgän urın Tennessi buldı; yäkşämbe töştän soñ yaqınça 339 meñ keşe utsız qaldı.
Mississipida yaqınça 180 meñ keşe, Luizianada isä 150 meñ tiräse keşe qarañğıda qaldı. Texas häm Djordjiya ştatlarında barlığı 200 meñ keşe utsız qaldı; qotqaru häm ğadättän tış xäl törkemnäre êlektr birü öçen kön-tön dimiçä êşli.
Köçle qar yawışı Ogayonı da kertep, Urta Könbatışta da zur zıyan kiterä; Sinsinäti häm Kolambus kebek zur şähärlärdä şuşı waqıtqa qädär 15-25 santimetr qar cıyıldı.
Kolambus mêrı Êndryu Ginter video belderüendä: "Tışta çınnan da bik qurqınıç. Aşığıç bulmasa, öydä qalırğa tırışığız," — dip äytte.
Arkanzas (20 santimetr), Illinoys (28 santimetr), Indiana (33 santimetr), Kanzas (30 santimetr), Missuri (18 santimetr) häm Oklaxomanı (15 santimetr) da kertep, başqa ştatlarda da küp qar yawdı. Sinoptiklar mäğlümatı buyınça Tönyaq Texasnıñ qayber öleşlärendä 13 santimetr qar yawdı.
Qar buranı säbäple AQŞta xäzergä qädär 16 meñnän artıq reys ğämäldän çıqarıldı, meñnärçä oçış isä küp sandağı aêroportlarda soñarıp başqarıldı.
Sinoptiklar suıqlarnıñ küp ştatlarda atna başına qädär däwam itäçägen belderde.