Äfganstannıñ tönyağında 6.3 ball zurlığındağı cir teträw näticäsendä, kim digändä, 20 keşe häläk bulğan, 320 tiräse yaralanğan, dip xäbär itä ilneñ sälamätlek saqlaw ministrlığı.

Balkx häm Samangan vilayätlärendä "320 tiräse watandaş yaralanğan, 20dän artıq keşe häläk bulğan", dip belderde ministrlıq wäkile Şärafät Zaman jurnalistlar belän urtaqlaşqan video möräcäğätendä. Ul bu sannarnıñ älegä berençel mäğlümat ikänen iskärtte.

Cir teträw yakşämbe cirle waqıt belän kiçke 20 säğat 30 minutta, Mazari-Şärif şähäre yanında, 28 kilometr tiränlektä bulğan, dip xäbär itä AQŞ Geologik Tikşerenü Xezmäte.

Germaniyä geologik tikşerenü üzäge moñarçı cir teträw köçen 6.4 ball dip bäyälägän ide.

31 avgustta Äfganstan tarixında iñ küp qorbannar kitergän cir teträw küzätelde: könçığış töbäktä 6.0 ball zurlığındağı teträw näticäsendä 2200dän artıq keşe häläk buldı.

Äfganstanda cir teträwlär yış bula, bigräk tä Hindukuş tawları tiräsendä, monda Awraziyä häm Hind plitäläre oçraşa. 1900 yıldan birle tönyaq-könçığış Äfganstanda 7dän yuğarı magnitudalı 12 cir teträw terkälgän, dip belderä Britaniya Geologik Tikşerenü Xezmäteneñ seysmologı Brayan Bapti.