AQŞ belän İzrailneñ İranğa qarşı suğışı dürtençe atnasına kergändä, Demokrat senator Kris Van Xollen AQŞ İlbaşı Donald Trampnı Tähran belän söyläşülär ütkärü mäs’äläsendä yalğan söyläwdä ğayepläde.
“CNN” kanalına birgän interv’yusında Van Xollen, Trampnıñ "İran söyläşülärdä qatnaşa häm bäreleşne tuqtatu öçen AQŞnıñ barlıq taläplären qabul itärgä äzer" digän süzläreneñ döres tügellegen belderde.
Senator: "Qızğanıçqa qarşı, Donald Trampnıñ baştan uq Amerika xalqına yalğan söyläwen häm monı däwam itüen beldek",- dide.
Trampnıñ süzlärendäge bäxäsle "söyläşülär", İrannıñ uran bayıtunı tuqtatuı, bayıtılğan uran zapasların yuqqa çıgaruı häm Ormuz buğazın xalıqara neft transpotlawı öçen yañadan açuı turındagı taläplärne üz êçenä alğan häm suğışnı tuqtatunı maqsat itkän yäşeren êlemtälär belän bäyle ide.
Van Xollen, şulay uq, İrannıñ töp neft êksportı terminalı bulğan Xarg utrawın maqsat itep aluçı plannarnı da kertep, AQŞnıñ İran ênergetika asqormasına yasağan teläsä-qaysı höcümeneñ "suğış cinayäte" bulıp sanalaçağı turında kisätte.
Tramp, düşämbe könne “Truth Social” çeltärendäge yazmasında İran belän söyläşülärneñ "bik yaxşı" häm "näticäle" baruın äytep, İrannıñ ênergetika stantsiyälärenä häm ênergetika asqormasına yasalğan höcümnärgä biş könlek tınlıq iğlan itelüen beldergän ide.
İran wäqalätleläre Trampnıñ bu açıqlawların qatğıy räweştä kire qaqtı häm turıdan-turı yäisä çitlätep bernindi söyläşüneñ bulmawın assızıqladı.
