AQŞ ilbaşı Donal’d Tramp şimbä könne yasağan belderüendä, Kambodja belän Tailand arasında tiz arada tınıçlıq kileşüe imzalanaçağın häm monıñ öçen Malayziyägä yul totuın äytte.

Ul “Truth Social “platformasında: “Kambodja belän Tailand arasında üzem ğorurlanıp aradaşçı bulğan Tınıçlıq kileşüenä qul quyu öçen Malayziyägä kitäm,” – dip yazdı.

Tramp Tailandnıñ êlekkege patşabikäse häm patşanıñ änise Sirikitneñ wafat buluı säbäple “Qızğanıç, Tailand patşabikäse küptän tügel wafat buldı. Min Tailand xalqınıñ qayğısın urtaqlaşam” dip äytte.

Ul şulay uq Tailand prem’yer-ministrı belän oçraşırğa planlaştıruın da belderde.

AQŞ ilbaşı ASEAN illäre liderları belän kiçke aş mäclesendä qatnaşacaq häm anıñ iyül’ ayında bulğan qanlı çik bäreleşlärennän soñ Malayziya prem’yer-ministrı Änwär İbrahim aradaşçılığında utnı tuqtatu belän täêmin itelgän Kambodja belän Tailand arasında imzalanacaq tınıçlıq kileşüeneñ şahitı buluı kötelä.

Tramp imza salu tantanasınıñ barlıq yaqlar öçen uñaylı waqıtta ütkäreläçägen belderde.