Däwlät televideniyese “Vesti” Telegram kanalında urnaştırğan xäbärdä Kreml’ yäkşämbe könne yasağan belderüendä Rusiya däwlät başlığı Vladimir Putin belän AQŞ ilbaşı Donald Tramp arasındağı oçraşunıñ ğämäldän çığarıluınıñ döres bulmawı, ämma bu oçraşu öçen äzerlek êşläre başqarılırğa tiyeşlegen belderde diyelde.

Kreml’ süzçese Dmitriy Peskov däwlät televideniyese xäbärçese Pavel Zarubinğa yasağan belderüendä:
“İlbaşları küreşü öçen genä oçraşa almıy — alar üz waqıtların äräm itä almıylar häm bu turıda açıq söylilär. Şuña kürä Rusiya tışqı êşlär ministrı Sergey Lavrovqa häm AQŞ däwlät särqatibe Marko Rubioğa bu prośessnı äzerläw öçen boyırıq birelde. Prośess bik qatlawlı”, – dip äytte.

Peskov monnan tış, AQŞnıñ Rusiya neft’ gigantları “Lukoil” häm “Rosneft’”kä qarata kertkän sankśiyälären duslarça bulmağan adım dip bäyäläde, ämma Rusiyäneñ, AQŞnı da kertep, barlıq illär belän dustanä mönäsäbätlär urnaştırırğa tırışuın assızıqladı.

Ul süzen bolay dip däwam itte:
“AQŞ ilbaşı äytkän törle neçkäleklärgä qaramastan, bez barıber üz mänfäğätlärebezgä iğtibar itärgä tiyeşbez. Bezneñ mänfäğätlärebez – barlıq illär belän, şul isäptän AQŞ belän dä, yaxşı mönäsäbätlär urnaştıru. Älbättä, bu atnadağı ğämällär duşlarca tügel ide häm çınnan da mönäsäbätlärne torğızu perspektivalarına zıyan kiterdelär. Ämma bu bez bu maqsatlardan baş tartırğa tiyeş digän süz tügel. Bez üzebez öçen faydalı bulğannı êşlärgä tiyeşbez”.

Peskov şulay uq tuñdırılğan Rusiya aktivların ixtimal konfiskaśiyäläwdä qatnaşqan härkemne Rusiyäneñ xökem itäçägen dä äytte.