Kolumbiya ilbaşı Gustavo Petro Karib diñgezendä AQŞ bombalagan soñgı korabnıñ Kolumbiyäneke ikänen häm anda ileneñ watandaşları buluın belderde.

"Yaňa suğış mäydanı açıldı: Karib diñgeze," dip yazdı Petro “X” platformasında. "Bu höcüm böten Latın Amerikasına häm Karib diñgezenä qarşı," dip östäde ul

Aq Yort bu xaqta älegä añlatma birmäde.

Petro, xäzerge waqıtta Belgiyağa säfär qılıp, Awrupa citäkçeläre belän oçraşqan arada, AQŞ senatorı Êdem Şiffnıñ Tim Kain belän bergä Karib diñgezendäge korablarga höcümnärne tuqtatu öçen tırışaçağın beldergän yazmasına cawap birde.

AQŞ ilbaşı Donald Tramp bu höcüm turında yakşämbe könne iğlan itte, ul soñğı atnalarda bulğan dürtençe höcüm sanala.

Höcüm näticäsendä korabta bulğan barlıq dürt keşe häläk buldı, dip belderde AQŞ saqlanu ministrı Pet Hegset üzeneñ sotsial çeltär yazmasında.

Tramp administratsiyäse mäğlümatlarına kürä, höcümnär näticäsendä, kim digändä, 21 keşe häläk bulğan. Bu höcümnär töbäktäge kiyerenkelekne arttırdı häm Vaşington düşämbe könne Venesuêla belän diplomatik êlemtälärne tuqtattı.

Venesuêla däwlät başlığı Nikolas Maduro AQŞ xärbiläre höcüm itkän oçraqta üz ilen yaqlaw öçen ğädättän tış xäl iğlan itärgä äzerlänüen belderde.

Tramp administratsiyäse narkotik kartellären, şul isäptän Venesuêlanıñ “Tren de Aragua”, Meksikanıñ “Sinaloa” kartelı häm Salvadornıñ “MS-13” törkemnären "terror oyışmaları" dip bilgeläde.

Däwlät särqatibe Marko Rubio çärşämbe könne ilbaşınıñ kongress röxsätennän başqa höcümnärne başqaru xoquqına iyä buluın belderde.

"Bolar AQŞqa qarşı iminlek yanawçı ob'yektlarga yünältelgän maqsatlı höcümnär," dip äytte ul.