Däwlät xäbär agentlığı “TASS”nıñ xäbärenä qaraganda, Rusiyä saqlanu ministrlığı üzeneñ xärbi berlekläreneñ Ukrainanıñ kön’yaq-könbatışındağı Zaporijye töbägendä urnaşqan Svitkove awılın basıp aluın açıqladı.
Rusiyä, Zaporijye töbägeneñ yaqınça 75 protsentın üz kontrolendä totsa da, älege soñğı waqıyğağa qadär frоnt sızığı 2022 yıldan birle zur däräcädä üzgäreşsez qalğan ide.
İkençe yaqtan, Rusiyäneñ Krasnodar töbäge gubernatorı Qara diñgezdäge neft’ produktları, aşlıq, kümer häm başka tovarlar saqlana torğan Taman portınıñ yäkşämbe könne Ukraina dronnarı höcümendä zarar kürüen citkerde.
Veniamin Kondratyev “Telegram”da urtaqlaşqan xäbärendä Taman portı urnaşqan Volna awılında neft’ saqlaw tankı, ambar häm terminallarnıñ zarar kürüen, şulay uq, ike keşeneñ yaralanuın açıqladı.
Kondratyev porttağı berniçä urındağı yangınnı sünderü öçen 100dän artıq keşeneñ êşläwen belderde. Şul uq waqıtta, ayırım höcümnärdä yal itü şähäre Soçi häm Anapağa yaqın Yurovka awılında da az bulsa da zıyan bulğan.
“Fälakät çigendä”
Ukraina yağında isä Zaporijye töbäge xärbi idaräse töne buyı oyıştırılğan Rusiyä keşesez oçu apparatları höcümendä öç keşeneñ yaralanuın belderde.
Kiyev merı Vitali Kliçko AQŞ mediasına birgän interv’yusında şähärneñ xälen "fälakät çigendä" dip atadı.
Kliçko süzlärençä, höcümnär säbäple xalıq kiñ külämle êlektr özelülär, cılıtu häm su täêminatındağı kirtälär belän oçraşa. Kliçko, şulay uq, Ukraina İlbaşı Volodimir Zelenskiynı tänqıytläde: cirle xökümätkä qarata yasalğan tıqşınularnıñ üzäksezländerü buyınça möhim reformalarnı "qaqşatuın" alğa sörde.
Ukraina hawa köçläre “Telegram”da yasalğan belderüdä hawa saqlanu sistemalarınıñ töne buyı Rusiyä köçläre tarafınnan cibärelgän 83 dronnıñ 55en täêsirsez xälgä kiterüen urtaqlaştı.
