Bötendönya sälamätlek saqlaw oyışması beldergänçä, suğış arqasında xaräbägä äwerelgän Ğazzädä soñğı yıl yarım êçendä aşığıç meditsina êvakuatsiyäsen kötep torgan 1000nän artıq awıru wafat bulğan.
Bötendönya sälamätlek saqlaw oyışması başlığı Tedros Adxanom Gebreyesus comğa könne “X” platformasında yazğança, berläşmä häm anıñ xezmättäşläre suğış başlanğannan birle Ğazzädän citdi sälamätlek problemaları bulğan 10 600dän artıq awırunı, şul isäptän 5 600 balanı êvakuatsiyälägän.
Ämma ul Ğazzädä döres däwalanu alu öçen êvakuatsiyälänü kötüçelärneñ äle bik küp buluı turında kisätä.
Ğazzä sälamätlek saqlaw ministrlığı mäğlümatlarına qarağanda, barı tik 2024 yılnıñ iyülennän 2025 yılnıñ 28 noyabrenä qädär 1092 awıru meditsina êvakuatsiyäsen kötep wafat bulğan.
Tedros Adxanom Gebreyesus bu sannıñ tağın da yuğarıraq bulu mömkinlegenä basım yasap, illärne Ğazzädän kilgän awırularğa işeklären açarga häm Yordannıñ basıp alınğan Könbatış üzänlege, şul isäptän Könçığış Qudüstän meditsina êvakuatsiyäsen başlarğa çaqırdı.
Tormışlar şuña bäyle
Bötendönya sälamätlek saqlaw oyışması süzçese Tarik Yasareviç comğa könne Jenevada jurnalistlarğa yaqınça 18 500 awırunıñ äle haman Ğazzä tışında däwalanuğa ixtiyacı barlığın, alarnıñ 4 000nän artığı bala buluın citkerde.
“Çikne tanımawçı tabiblar оyışması”nnan ber wäqalätle bu ay başında “AFP”ğa intervyusında Bötendönya sälamätlek saqlaw oyışması sannarınıñ barı terkälgän awırularnı çağıldıruın, ä çınbarlıqta aşığıç êvakuatsiyägä moxtaç keşelärneñ berniçä tapqır kübräk buluın söyläde.
«Bu keşelärneñ kübeseneñ kötep torır waqıtı yuq», — dip basım yasadı Yasareviç.
AQŞ täqdim itkän utnı tuqtatu kileşüe Ğazzädä suğışnı tuqtattı, ämma 10 oktyabr'dän birle ğamäldä bulğan kileşü, İzrail belän “Xamas” här könne diyärlek ber-bersen anı bozuda ğayepläw säbäple, bik zäğıyf bulıp qala birä.
