Sudannıñ üzäk töbägendä urnaşqan Tön’yaq Kordofan vilayätendä Operativ yärdäm köçläre oyıştırğan dron höcüme näticäsendä kimendä 40 keşe hälaq bulğan.

Tön’yaq Kordofandağı gumanitar êşlär komissarı, iseme açıqlanmağan räsmi zat bularaq, “Äl Cäzirä” telekanalına düşämbe könne yasağan belderüendä, höcümneñ vilayät’ başqalası Äl-Ubaydnıñ könçığışındağı Äl-Luweyb awılında tınıç xalıqnı nişat itep aluın häm ülemnär buluın äytkän.

Vilayät’ xökümäte moñarçı yasağan belderüendä, awıldağı matäm çatırına yasalğan höcümdä aralarında balalar häm xatın-qızlar da bulğan tınıç xalıqtan distälagän keşeneñ ülüe häm yaralanuı turında xäbär itkän ide.

Vilayät’ xökümäte xalıqara cämäğat’çelekne Operativ yärdäm köçlären  tiz arada terror oyışması dip tanırğa çaqırdı häm bu oyışmanı qoralsız tınıç xalıqqa qarata êtnik häm rasist cinayät’lär êşläwdä ğäyepläde.

Höcüm Operativ yärdäm köçläre  Äl-Ubayd şähärenä yaqında höcüm başlayaçağın beldergännan  soñ buldı. Oyışma xalıqnı “ışanıçlı, imin koridorlar” aşa şähärdän kitärgä çaqırğan ide.

Xalıqara Miğraśiya oyışması mäğ’lümatına qarağanda, oktyabr’ axırlarınnan birle töbäktäge iminlek xäle naçarayğanğa kürä Tön’yaq häm Kön’yaq Kordofannan 38 meñnän artıq keşe qaçqan.

Operativ yärdäm köçläre Sudan armiyäse belän däwam itkän suğış qısalarında Tön’yaq Kordofandağı Bara şähäreneñ kontrolen üz qulına alğan, ämma tınıç xalıqnı maqsat itep aluın kire qaqqan.

26 oktyabr’dä Operativ yärdäm köçläre Tön’yaq Darfur vilayäte başqalası Äl-Faşirneñ kontrolen üz qulına aldı, cirle häm xalıqara oyışmalar mäğ’lümatına qarağanda tınıç xalıqqa qarşı küpläp üterülär oyıştırdı. Belgeçlär bu höcüm Sudannıñ geografik büleneşen nığıtırğa mömkin dip kisätä.

Sudan 2023 yılnıñ 15 aprelennän birle regional’ häm xalıqara aradaşçılıq tırışlıqlarına qaramastan tämamlana almağan ber suğış qoçağında.