Törkiyä tışqı êşlär ministrı Xakan Fidan ilbaşı Räcäp Tayyip Ärdoğan belän Amerika däwlät başlığı Donald Tramp arasında bulğan oçraşunıñ uñay uzuın äytte häm Törkiyä liderınıñ Trampnı Änkaraga çaqıruın belderde.
“Xörmätle ilbaşınıñ vizitı bik dustanä, uñay häm konstruktiv buldı. Ul Trampnı bezneñ ilgä ikeyaqlı säfär öçen häm kiläse yıl Änkarada uzaçaq NATO sammitına çaqırdı. Oçraşu waqıtında CAATSA sanktsiyäläre kebek mäsälälärne çişü kiräklege turında kileşügä ireşelde, çönki alar bezneñ mönäsäbätlärne tağın da nığıtuğa kirtä bulıp tora,” dip belderde Fidan şimbä könne matbuğat ähellärenä.
Fidan, şulay uq, saqlanu sänäğäte ölkäsendäge mömkin adımnarnı tikşerü turında da äytte.
“Bez iqtisadi häm säwdä mönäsäbätlären tigez räweştä alğa cibärü häm säwdä külämen 100 milliard dollarğa citkerü öçen konkret proyektlar östendä êşläyäçäkbez,” dide ul.
Ul, şulay uq, ilbaşı Ärdoğannıñ Törkiyä-Amerika cämäğätçelege äğzaları belän, törek häm amerikalı êşquarlar belän oçraşuın da citkerde.
Fälästin mäsäläsen yaqlaw
Fidan Fälästin häm Ğazzä qamalışı mäsäläsenä dä tuqtaldı häm Trampnı blokada astındağı töbäktä ut tuqtatu kileşüenä ireşü öçen aradaşçı bulırğa çaqıruların belderde.
“Bez Ğazzä töbägendä ut tuqtatu kileşüenä tiz arada ireşü zarurlığın häm töbäkkä gumanitar yärdäm citkerü möhimlegen äyttik. Bez bergä yähüdlärneñ Yordannıñ Könbatış üzänlegen anneksiyäläweneñ tulısınça qabul itelmäs buluın häm Ğazzädä yäşäwçelärne üz cirlärennän quıp çığarırğa tırışularğa qarşı buluıbıznı assızıqladıq,” dide ul.
“Törkiyä isemennän, bez Fälästin turındağı barlıq oçraşularnı yä citäklädek, yä koordinaśiyälädek, yäisä yärdäm ittek. Bez barısında da qatnaştıq häm, şöker, Fälästin mäsäläsen iñ köçle räweştä yaqladıq,” dide Fidan.
Ärdoğan BMO Ğomum şurasında küp kenä Könbatış illäreneñ Fälästinne tanuların bik möhim waqıyğa dip bäyäläde.
“Bu näticä İslam Xezmättäşlek Oyışması-Gäräp Berlege, Urtaq Kontakt Törkeme bularaq alıp barğan êşlärebezneñ konkret näticäse bulıp tora. Bez Fälästinneñ ğadel däğwasın härwaqıt häm här platformada yaqlawıbıznı däwam itäçäkbez,” dide Fidan.
