Törkiyäneñ Däwlät gimnına 105 yıl tuldı
Mäxmät Akif Ärsoy yazğan häm törek milläteneñ bäysezlege simvolı bulğan Däwlät gimnı 105 yıl êlek qabul itelde.
Mäxmät Akif Ärsoy yazğan häm törek milläteneñ bäysezlege simvolı bulğan Törkiyäneñ Däwlät gimnına 105 yıl tuldı. Anın qızıqlı tarixı bar. Törkiyäneñ Böyek Millät Mäclese, oyışqannan soñ ber yıl uzğaç, 500 lira külämendäge büläk belän 'Däwlät gimnı' yazu konkursı oyıştıra.
Bu konkursnı oyıştırğan ul waqıttağı Milli Mäğarif ministrı Riza Nur, cır tekstlarınnan tış, köye öçen dä 500 lira külämendä priz bilgeli. Mömkin qadär kübräk ğariza birü öçen, parlament gazetlarğa häm il buyınça mömkin bulğan här urınğa aktiv räweştä mäğlümat cibärä, häm 6 ay êçendä 724 şiğır' täqdim itelä.
Bu 724 şiğır'ne bäyäläw öçen Milli Mäğarif ministrlığı komissiyä tözi. Komissiyägä bilgelängän êkspertlar alarnıñ härbersen uqıy häm bäyäli, arasınnan 6sın saylap ala. Başta aqçalata büläk arqasında bäygedä qatnaşırğa telämägän Burdur deputatı Mäxmät Akif Ärsoy soñraq Xamdulla Sufınıñ sorawı buyınça konkursqa quşıla, ul Törkiyä armiyäsenä bağışlanğan şiğıren täqdim itä. Saylap alu protsessınnan soñ, Mäxmät Akifnıñ şiğıre 1921 yılınıñ 12 martında Böyek Millät Mäclese utırışında alqışlar belän qabul itelä. Xamdulla Sufı Tanrıwer Mäclestä Milli Gimnnı uqığan berençe keşe bula. Gimn qabul itelgännän soñ, Mäxmät Akif Ärsoy byudjettan bülep birelgän 500 liranı xatın-qızlar häm balalarğa hönäri belem birüçe Darül Mesai fondına tapşıra.