Ärdoğan İzrailneñ Ğazzä häm Yordannıñ könbatış üzänlegendä höcümnären arttıruın assızıqladı

Törkiyä ilbaşı Räcäp Tayyip Ärdoğan çärşämbe könne Änkarada möselmannarnıñ möbaräk Ramazan ayı uñayınnan oyıştırılğan iftar aşı programmasında yasağan çığışında  bolay dide: “10 oktyabr’da  bezneñ dä tırışlıqlar belän ireşelgän utnı tuqtatuğa qaramastan, xoquqnı tanımawçı İzrail xökümäte Ğazzädä häm Yordannıñ könbatış üzänlegendä höcümnären däwam itä”.

Ul Ğazzädä Ramazan ayın qarşı alğan, pulya häm şrapnel êzläre belän tulı sıyınu urınnarında awız açqan fälästinlelärneñ zolımğa baş iyüdän baş tartıp, möselmannar öçen iman ürnäge kürsätülären äytte.

Ärdoğan töbäkkä gumanitar yärdäm kertüdä zur kirtälärneñ däwam itüen dä assızıqladı.

İlbaşı bolay dide: “Ğazzäneñ qotqaru yulı bulğan Räfax çik buyı  qapqasında İzraineñ  çikläwläre, zolımnarı, başbaştaqlıq ğamälläre däwam itä.”

Fälästin belän teläktäşlek

Räcäp Tayyip Ärdoğan bu izge könnärneñ dön’yanıñ törle poçmaqlarında üzläreneñ namusların, abruyların häm ireklären yaqlaw öçen  köräşüçe barlıq cäberlängän keşelärne, bigräk tä fälästinlelärne  azat itü çarası buluın teläde. Ul alar öçen doğa  qıluların belderde.

İzrail 2023 yılnıñ 8 nçe oktyabrendä Ğazzägä ayawsız höcüm başlattı, kübese xatın-qızlar häm balalar bulğan 72 meñnän artıq keşene üterde, 171 meñnän artıq keşene yaraladı.

AQŞ citäkçelegendä ireşelgän utnı tuqtatu kileşüe Ğazzädä 10 oktyabr’dä ğamälgä kerde.

 Läkin, utnı tuqtatuğa qaramastan, Ğazzä sälamätlek saqlaw räsmiläre mäğ’lümatına qarağanda, İzrail köçläre artilleriya utı häm qorallı höcümnär belän kileşüne yözlägän tapqır bozdı, kim digändä  615 keşene üterde, 1600dän artıq keşene yaraladı.