Üzäge Böyekbritaniyädä urnaşqan “Daily Mail” gäzetı xäbär itkänçä, AQŞ ilbaşı Donal'd Tramp maxsus köçlär komandirlarına Grenlandiyäne basıp alu planın äzerlärgä quşqan.
Xäbärgä qarağanda, Vaşingtonnıñ 3 ğıynwarda Venesuêlada ilbaşı Nikolas Maduro häm anıñ xatını urlanğan uñışlı xärbi operaśiyäsennän soñ ilbaşı yanındağı “säyäsi laçınnar” Rusiya häm Qıtay êşkä kereşkänçe utrawnı tiz arada basıp alırğa teli.
Xisapta äytelgänçä, Tramp Berläşkän maxsus operaśiyälär komandirlığına basıp alu planın êşlärgä quştı, ämma ğomum ştab başlıqları şurası moña qarşı çığa, bu qanunsız häm Kongress yärdämennän mäxrüm bulaçaq dip belderä.
Comğa könne Aq Yortta uzğan çarada çığış yasağan Tramp Grenlandiyäne basıp alu niyäten belderep bolay dide: “Telilärme-telämilärme, alarğa oşasa da, oşamasa da , Grenlandiya belän bäyle närsäder êşläyäçäkbez, çönki bez moña totınmasaq, Rusiyä yäki Qıtay Grenlandiyäne üz kontrolenä alaçaq, ä bez Rusiyä yäki Qıtaynıñ kürşelär buluın telämibez”.
“Min kileşüne ciñel yul belän yasarğa telär idem, ämma ägär ciñel yul belän bulmıy ikän, bez anı awır yul belän yasarbız”,- dip turıdan-turı yanadı ul.
Bu belderüdän soñ Grenlandiyädäge säyäsi partiyälär citäkçeläre urtaq belderü bastırıp, “Bez amerikalı bulırğa telämibez, daniyäle dä bulırğa telämibez, bez grenlandiyäle bulırğa telibez” dip äytkännär ide.
Belgeçlär Trampnıñ mondıy totışı AQŞ belän Awrupa däwlätläre arasındağı mönäsäbätlärgä citdi zıyan salırğa häm bu adım xätta NATOnıñ yuqqa çığuına kiterergä mömkin dip kisätälär.
