“NBC News” xäbär itüençä, AQŞ ilbaşı Donald Tramp pänçeşämbe könne AQŞ cir öste ğaskärlären İranğa xäzer cibärü turında uylawnıñ "waqıt yuğaltu" bulaçağın belderde.
“NBC” belän telefon aşa söyläşkändä, Tramp: "Bu waqıt yuğaltu bulaçaq. Alar barısın da yuğalttı. Alar üzläreneñ flotın yuğalttı. Alar yuğaltırğa mömkin bulğan bar närsäne dä yuğalttı," - dide häm İran tışqı êşlär ministrı Abbas Araqçınıñ İrannıñ AQŞ yaki İzrail cir öste höcümenä äzer buluı turındagı süzlären "buş süzlär" dip kire qaqtı.
Tramp, şulay uq, İran xökümäten tarqatırğa teläwen belderde: "Bez anda tiz arada kerep, barısın da çistartırğa telibez," - dide.
"Bez un yıldan soñ ilne torğızırğa tiyeşle keşene telämibez," - dide Tramp, yaña lider öçen ideyäläre buluın kürsätep, läkin isemnärne atawdan tıyıldı.
Şimbä könne başlanğan AQŞ-İzrail höcümnärendä Yuğarı lider Ali Xameney üterelgännän soñ, Tramp êlegräk İrannıñ kiläse liderın bilgeläwgä "qatnaşırğa" tiyeşlegen beldergän ide.
İzrail AQŞ belän berrättän İran belän suğışnıñ "yaña êtapı" qısalarında "rejim asqormasına" höcüm itüen iğlan itkännän soñ, comğa könne Tähranda köçle höcümnär turında xäbär itelde.
Tramp Möctäba Xameneyga qarşı!
Pänçeşämbe könne AQŞ ilbaşı İranıñ kiläse liderın saylawda şäxsi fikeren äytergä ömetlänüen belderde, bu xälne Venesuêlada Madurodan soñğı lidernı saylawdagı role belän çağıştırdı.
“Axios” belän äñgämädä Tramp: "Min Venesuêlada Delsi (Rodriges) belän bulğan kebek, bilgeläwdä qatnaşırğa tiyeş," - dide, üterelgän Ali Xameney ulı häm potensial varislarnıñ berse dip sanalğan Möctäba Xameneynı "ähämiyätsez" dip atadı.
Tramp märxüm dini lidernıñ säyäsäten däwam itäçäk varisnı qabul itmäyäçägen açıq belderde, mondıy adım AQŞnı "biş yıl êçendä" suğışqa kire qaytarırğa mömkin dip kisätte.
Xameney üterelgännän soñ, İran äle yaña dini lider iğlan itmäde.
Räsmi däwlät wazıyfası bulmasa da, Möctäba Xameney, ğadättä, Xameneynıñ balaları arasında iñ yogıntılısı dip sanala häm 2019 yılda AQŞ Qaznaçılıq ministrlığınıñ sanktsiyälär isemlegenä östälgän. Anıñ, şulay uq, 2009 yılğı İrandagı bäxäsle saylawlardan soñ protestlarnı bastıru öçen qullanılğan köçlär belän bäyle buluı äytelä.
İran Konstitutsiyäse buyınça, varis saylaw öçen 88 äğzadan torğan Belgeçlär şurası cawaplı.
