Sudandağı BMO Keşe xoquqların yaqlaw ofisı Äl Faşirdä Operativ yärdäm köçläreneñ ayawsız höcümnäreneñ artuın, grajdanlılarnıñ küzallap bulmıy torğan wäxşilekkä duçar qaluın citkerde.

Sudannıñ BMO keşe xoquqların yaqlaw wäkile Li Fung şimbä könne X platformasında urın alğan ber video yazmada bolay dide: “Soñğı 10 köndä Äl Faşirdä ayawsız höcümnärneñ artuın kürdek. Şähär qayğı şähärenä aylände. 18 aylıq qamalış häm bäreleşlärdä isän qalğannar xäzer wäxşilek kürä. Aralarında xatın-qız, balalar häm xastaxanälär belän mäktäplärdä imin urın êzläwçe yaralanuçılar da bulğan yözlägän keşe üterelde. Ğailälär qaçqan waqıtta yaqtı dönyadan kitte. Qalğannarı isä yuğaldı.”

BMO wäkile mediŝina personalı häm jurnalistlar belän ber rättän meñlägän keşeneñ qulğa alınuın äytep: “Köçläwneñ qırıs çınbarlığı härwaqıt bar. Bu wazğıyät Äl Faşirdän çığu öçen imin yulnıñ bulmawın häm şähärdä qalğan olı yäştägelär, ğariplär, xronik xastalığı bulğannar häm yaralanuçılarnı da kertep keşelärneñ qurqınıç astında buluın kürsätä. Xaosnı qına tügel, keşe tormışına häm namusına qarağan sistematik höcüm bara. Kübese êtnik nigezdä ayawsız höcümnär,” – dide.

Fung äytüençä Sudandağı BMO keşe xoquqların yaqlaw ofisı xoquq bozularnı häm naçar möğamäläne terkäp bara.

“Äl Faşirdä qan qoyıla, êşkä kereşergä waqıt. Qırıslıqnı tuqtatu kiräk. Grajdanlılarnı saqlarğa tiyeş bez. Xisapka tartu – dähşätlärneñ qabatlanmawı öçen berdänber yul. Bar dönya xäzer ük êşkä kereşergä tiyeş,” – dide ul.

26 oktäbr könne xärbiläşterelgän Operativ yärdäm köçläre Äl Faşir şähären qulğa töşerep, grajdanlılarğa qarata küpläp üterü başqardı.