AQŞ ilbaşı Donald Tramp sişämbe könne yasalma zihen yärdämendä yasalğan ber fotoräsem urtaqlaştı. Anda ul Amerika bayrağın totıp tora, ä yanında “Grenlandiya — AQŞ territoriyäse, 2026 yılda nigez salındı” dip yazılğan taqta kürenä. Trampıñ ike yağında ilbaşı urınbasarı JD Vêns häm däwlät särqätibe Marko Rubio bar.
Çärşämbe könne Davosta buluı kötelgän Tramp başqa yazmasında global êlitanıñ oçraşuında Grenlandiyanı qulğa töşerü omtılışı buyınça ‘törle yaqlar’ belän söyläşügä rıza buluın belderde.
Tramp üz platformasında: ‘Şveytsariyäneñ Davos qalasında törle yaqlarnıñ oçraşuın qabul ittem’,— dip yazdı. Şulay uq ul: ‘Härkemgä bik açıq itep äytäm, Grenlandiya milli häm dönya qurqınıçsızlığı öçen mäcbüri. Monnan kire qaytu yuq — bu mäsälädä härkem ber fikerdä!’ — digän süzlärne dä östäde.
Tramp, monnan tış, “Truth Social” platformasında NATO ğomum särqatibe Mark Rutte belän Grenlandiya mäsäläsendä ‘bik yaxşı telefon söyläşüe’ ütkärüen yazdı.
Tramp düşämbe könne jurnalistlarğa töbäkne qulğa alu omtılışına qarşı Awrupa liderlarınıñ ‘bik ozaq qarşılıq kürsätmäyäçägen’ uylawın äytte häm: ‘Alar anı saqlıy almayaçaq’,— dip östäde.
AQŞ ilbaşı ilneñ milli qurqınıçsızlığı säbäple häm Arktikadağı köndäşlärne tuqtatu öçen Grenlandiyanı alu kiräklegen äytä. Monnan tış, AQŞ kontrolenä qarşı çıqqan häm töbäkkä az sanda ğaskär cibärgän Awrupa berlektäşlärenä tamğaxanä salımı belän yanadı.
Daniya häm Grenlandiya töbäkne satunı küzdä totuçı här täqdimne kire qaqtı. Bu täqdim häm tamğaxanä salımı yanawı Awrupada kiñ qolaçlı reaktsiyä tudırdı.
